Шерзаттың ісі бойынша сотталғандар толық ақтауды сұрады шешім қабылданды

14 сәуірде кассациялық сот Шерзат Полаттың өліміне қатысты іс бойынша сотталған екі адамның шағымын қарады. Олар әлі де кінәсіз екенін алға тартып отыр, деп хабарлайды Tengrinews.kz.

14 сәуірде кассациялық сот Шерзат Полаттың өліміне қатысты іс бойынша сотталған екі адамның шағымын қарады. Олар әлі де кінәсіз екенін алға тартып отыр, деп хабарлайды Tengrinews.kz.

Бұған дейін жәбірленуші тараптың өкілі Мейірман Шекеев сотталған сегіз адамның екеуі – Азамат Тоқтаубаев пен Дидар Қалиахметов кассациялық шағым түсіргенін хабарлаған болатын. Екеуі де үкіммен келіспей, ақтауды сұраған.

Алайда Шекеевтің сөзінше, 14 сәуірдегі отырыс қорытындысы бойынша кассациялық сот сотталғандардың уәждерін негізсіз деп таныды. Алқа бұған дейін шыққан үкімдерді өзгеріссіз қалдырды.

Еске сала кетейік, 2025 жылғы мамырда сот айыптау үкімін шығарып, үкім бойынша 24 жастағы Азамат Тоқтаубаев 15 жылға, ал Дидар Қалиахметов 7 жылға бас бостандығынан айырылған болатын.

2024 жылғы 4 қазанда түнде Талғарда жасөспірімді аяусыз өлтіріп кеткен. 16 жастағы Шерзат Полат дүкенде әкесіне көмектесіп жүргенде, сатып алушымен арада жанжал туындаған. Ол таныстарына қоңырау шалып, келген топ Шерзатты, оның әкесі мен ағасын соққыға жығып, пышақ пен мылтық қолданған. Кісі өлтіру ісін тергеуді ішкі істер министрі Ержан Сәденов бақылауына алды. Талғарға ІІМ-нен арнайы топ жіберілді.

2025 жылғы 5 шілдеде сот Шерзат Полаттың өліміне қатысты іс бойынша тоғыз сотталушыға үкім шығарды.

Тергеу мәліметінше, Шерзатқа өлімге әкеп соққан пышақ жарақатын салған басты айыпталушы Абзал Шынасыл орташа қауіпсіздік колониясында 23 жыл бас бостандығынан айырылды. Ол тағылған барлық бап бойынша кінәлі деп танылды.

Равиль Сакиев "Адам өлтіруге оқталу" және "Бұзақылық" баптары бойынша кінәлі деп танылып, 20 жыл бас бостандығынан айырылды.

Азамат Тоқтаубаев бұрынғы ауыр қылмысы үшін соттылығы мен өтелмеген жазасын ескере отырып, "Бұзақылық" және "Ұрлық" баптары бойынша орташа қауіпсіздік мекемесінде 15 жылға сотталды.

Нұрқияс Ілиясов бұрынғы соттылығы мен өтелмеген жазасы ескеріле отырып, "Бұзақылық" бабы бойынша 9 жыл бас бостандығынан айырылды.

Шыңғыс Белғожаев, Дархан Әскентай, Нұрбол Тоқтаубаев, Дидар Қалиахмет "Бұзақылық" бабы бойынша әрқайсысы жеті жылға сотталды.

Кәмелетке толмаған Д. Ы. Қылмыстық кодекстің 434-бабы ("Қылмыс туралы хабарламау") бойынша 1 жыл 6 ай жазаға тартылып, 25 шілдеде бостандыққа шықты, себебі оған қатысты бұлтартпау шарасының күші жойылды.

Былтыр тамызда сот алқасы Шерзат ісі бойынша сотталған сегіз адамға қатысты үкімді күшінде қалдырды.