Алматыда балалар үйінің тәрбиеленушілері үшін жаңа жылдық шырша мерекесі ұйымдастырылды

Жаңа жыл – үміт пен қуанышқа толы ерекше мереке. Әсіресе кішкентай бүлдіршіндер мерекеден ғажайыпты күтеді.

Алматыдағы Оқушылар сарайында балалар үйінің тәрбиеленушілері үшін жаңажылдық шырша мерекесі ұйымдастырылды. 400-ден аса бала өнер көрсетіп, қызықты ойындарға қатысып, сыйлыққа ие болды.

Әр бала бақытты болуға лайықты. Шырша мерекесіне келген бүлдіршіндердің бал-бұл жанған жүздерінен, риясыз күлкісінен мерекенің әсерін байқау қиын емес. Оларды Оқушылар үйіне арнайы автобустармен әкелді. Алып шырша жағылып, нағыз ертегідегідей бағдарлама ұйымдастырылды

Асыл Кенганова, тәрбиеленуші:

- Сіздерді келіп жеткен Жаңа жылдарыңызбен құттықтаймын. Маған өте қатты ұнап жатыр. Менің ең бақытты сәтімнің бірі Жаңа жыл болды.

Селим Саликов, тәрбиеленуші:

- Бүгінгі көңіл-күйім өте жақсы. Мен осы жаңа жылда ханзада болып киіндім. Сіздерді жаңа жылыңызбен құттықтаймын. Ауырмаңыздар, бақытты болыңыз, жолдарыңыз ашық болсын!

«Достықтан туған ғажайып» атты мерекелік шараға «Жанұя» балалар кешені мен №2 арнаулы әлеуметтік қызметтерге мұқтаж балаларды қолдау орталығы, сондай-ақ, SOS балалар қалашығының тәрбиеленушілері қатысты. Ұйымдастырушылардың айтуынша, осындай кездесулер балалардың бойында мейірім мен жақсылыққа деген сенімді арттырады.

Жанғали Әбдіпатта, Оқушылар сарайы директорының Тәрбие жұмысы бойынша орынбасары:

- Алматы қаласы Оқушылар сарайы дәстүрлі түрде жыл сайын балалар үйінің тәрбиеленушілеріне жаңа жылдық қойылымдарды қойып отырамыз. Бұл жердегі мақсат балалардың көңіл күйлерін көтеріңкі, бір бірімен достасу, жылылықты сезіну болып табылады. Олар ғажайыпты күтетін болғандықтан біз оларға арнайы сыйлықтарымызды табыс етеміз.

Шырша мерекесі қатысушылардың жас ерекшеліктерін ескере отырып әзірленген. 3–9 жас аралығындағы балалар үшін ертегі кейіпкерлерінің қатысуымен арнайы сахналық қойылым көрсетіліп, жаңа жылдық әндерді бірге шырқады. Ал 10–15 жас аралығындағы балалар би кешіне қатысып, қызықты ойындар мен сайыстарға атсалысты.

Бибігүл Малғаждарова, Алматы қаласы Білім басқармасы басшысының орынбасары:

- Бұл – ерекше мереке. Оны Білім басқармасы тоғызыншы жыл қатарынан Оқушылар сарайында ұйымдастырып келеді. Бұл мереке ата-ана қамқорлығынсыз қалған балаларға арналған. Соған қарамастан, олар педагогтар мен тәрбиешілер тарапынан махаббатқа, қамқорлыққа  кенде емес. Бұл олар үшін үлкен қуаныш. Олар бұл мерекені жыл сайын ерекше толқыныспен күтеді.

Қамқорлық пен мейірімге толы шырша мерекесі балалар үшін ұмытылмас әсер қалдырды. Олардың әрқайсысына сыйлық табыс етілді.

Авторлары: Гүлжан Көленқызы, Мұхит Құдықбаев