Алматыда ерекше балалардың ата анасына арналған Smart Mental мектебі іске қосылды

Алматы қаласының қоғамдық денсаулық сақтау басқармасының мәліметінше, жоба ата-аналарды қолдауға және баланың дамуына қатысты олардың біліктілігін арттыруға бағытталған.

— Негізгі мақсат — отбасыларға балалардың мінез-құлқы мен қажеттіліктерін тереңірек түсінуге, күнделікті қиындықтарды сенімді түрде еңсеруге және оңалту процесіне саналы түрде қатысуға көмектесу, — деп түсіндірді басқармадан.

Мектеп аясында педагогтер, психолог және логопед-дефектологтардың қатысуымен практикалық сабақтар өткізіледі. Ата-аналар қолжетімді әрі қолданбалы білім алып, үй жағдайында пайдалануға болатын дағдыларды меңгереді. Бұл дағдылар психо-сөйлеу дамуы тежелген, аутизм спектрінің бұзылыстары, Даун синдромы және басқа да интеллектуалдық бұзылысы бар балалармен қарым-қатынаста, оқытуда және күнделікті күтімде қолданылады.

Оқу бағдарламасын аяқтаған қатысушыларға оны өткені туралы куәлік беріледі. Орталық мамандарының айтуынша, жұмыстың бұл форматы мамандар мен отбасы арасында серіктестік орнатуға мүмкіндік береді және әр бала үшін оңалту процесінің тиімді әрі тұрақты болуына ықпал етеді.

— Қалалық балаларды оңалту орталығына жолдаманы міндетті әлеуметтік медициналық сақтандыру (МӘМС) аясында тіркелген жері бойынша емханадан тегін алуға болады, — деп хабарлады ведомство.

Еске салайық, бұған дейін Алматы дәрігерлері салмағы 730 грамм болып туған сәбиді аман алып қалды.