Алматыда полиция төтенше сәтті пайдаланып ұрлық жасағандарды ұстады

Қалалық криминалдық полиция қызметкерлері әлеуметтік желілерде кеңінен таралған екі оқиғаны тергеу барысында ашты.

Бірінші жағдайда бойжеткен қоғамдық орында кенеттен өзін нашар сезініп, жанындағы адамдар оған алғашқы көмек көрсеткен. Сол сәтті пайдаланып, бейтаныс адамдар оның ұялы телефонын ұрлап кеткен.

Екінші оқиға ойын-сауық орындарының бірінің маңында болған көшедегі төбелесте тіркелді. Дүрбелең кезінде күдіктілер жанжалға қатысушылардың бірінің смартфонын иемденген.

Алматы полиция департаменті криминалдық полиция басқармасының бастығы Асхат Дәулетияровтың айтуынша, екі жағдайда да күдіктілер айналадағы адамдардың назарын төтенше жағдайға аударған сәтте қылмыс жасаған.

Жедел-іздестіру шараларының нәтижесінде полиция күдіктілерді анықтап, ұстады. Қазір олардың басқа да ұқсас қылмыстарға қатысы тексеріліп жатыр.

Еске салайық, бұған дейін Алматыда пәтерлерге ұрлыққа түсіп жүрген күдікті ұсталғанын хабарлағанбыз.