Алматыда қолданбалы ғылыми зерттеулерге арналған ғылыми гранттар байқауы жарияланады

Гранттардың жалпы көлемі – 348 млн теңге. Бұл туралы Алматы қаласы әкімінің орынбасары Абзал Нүкеновтің Алматының дамуына және қаладағы міндеттерді шешуге арналған диссертациялық жұмыстар мен ғылыми-зерттеу жобаларын қорғаған авторлармен өткен стратегиялық кездесу барысында айтылды, – деп хабарлайды Aikyn.kz.

Кездесу форсайт-сессия форматында өтіп, ғылыми әзірлемелерді мегаполисті дамытуда тәжірибелік тұрғыда қолдануға арналды. Сондай-ақ  ғылыми қауымдастық өкілдерімен мұндай кездесулер алдағы уақытта тұрақты түрде өтетіні атап өтілді.

Талқылау барысында қатысушылар атмосфералық ауа сапасын жақсартуға, көлік жүйесін дамытуға, сондай-ақ маятниктік көші-қонның теріс әсерін төмендетуге бағытталған жобасын ұсынды. Аталған бағыттар қаланың тұрақты дамуы мен тұрғындардың тұрмыс сапасын арттырудың басты басымдықтары ретінде белгіленді.

Өз кезегінде Абзал Нүкенов қолдау байқау негізінде тек қолданбалы сипатта, қалалық инфрақұрылым мен басқару үдерістеріне нақты енгізуге бағытталған ғылыми жобаларға көрсетілетінін айтты.

Кездесу Алматы қаласы әкімдігі жанындағы Ғылым және технологиялар кеңесінің қызметі аясында өтті. Кеңес 2025 жылы ғылыми әлеуетті қалалық саясатқа жүйелі түрде біріктіру мақсатында құрылған. Ғылыми гранттар байқауын өткізу мегаполистің әлеуметтік-экономикалық дамуына тікелей байланысты зерттеулерді қолдаудың тәжірибелік тетіктерінің бірі ретінде қарастырылып отыр.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.