Алматыда Инфекциялық аурулардың ұлттық ғылыми орталығы ашылды

Алатау ауданында орналасқан нысанның ашылу рәсіміне ҚР Премьер-министрінің орынбасары — Мәдениет және ақпарат министрі Аида Балаева, ҚР Денсаулық сақтау министрі Ақмарал Әлназарова және Алматы әкімі Дархан Сатыбалды қатысты.

Алматы әкімдігінің мәліметінше, орталық клиникалық көмек пен ғылыми зерттеуді, цифрлық технологияны және білім беру бағдарламаларын біріктіреді. Мұнда ересектерге, балаларға және жүкті әйелдерге арналған мамандандырылған медициналық көмек көрсетіледі.

Төтенше жағдай кезінде орын саны 350-ден 500-ге дейін көбейеді. Орталықта диагностика мен емдеуден бастап күрделі зертханалық зерттеулер жүргізуге дейінгі толық цикл қамтамасыз етілген. Оның ішінде дәріге төзімді туберкулез түрлерін анықтау мен емдеу де бар.

— Қала үшін бұл орталықтың ашылуы инфекциялық қызметтің мүмкіндігін кеңейтіп, мамандандырылған медициналық көмектің қолжетімділігін арттырады, — деп хабарлады әкімдіктен.

Еске салайық, бұған дейін жыныстық инфекциялардың қайсысы Қазақстанда жиі анықталатынын жазғанбыз.