Алматыда Алатау теннис орталығы ашылды

Алматыда заманауи әрі халықаралық талапқа сай «Алатау» теннис орталығы ашылды.

Қаладағы ең үлкен кешен барлық кәсіби және әуесқой спортшыларға арналған. Мұнда теннис ракеткасын ұстаған балалардан бастап, кәсіби спортшыларға дейін жаттыға алады. Сонымен қатар  халықаралық турнир өткізуге болады.

«Алатау» теннис орталығының ашылу салтанатына қала әкімі Дархан Сатыбалды, Қазақстан теннис федерациясының президенті Болат Өтемұратов және ATP 250 Almaty Open турнирінің танымал өкілдері қатысты. Спортшылар балаларға шеберлік сабағын өткізіп, орталық аумағында ағаш отырғызды.

Жансая Бозбаева, қала тұрғыны:

- Қызым Аяла Болатова осы теннисті 4 жасынан бастап ойнайды, қазір 9 жаста, өте жақсы көреді. Балалар үшін бүгінгі күн есте қалатын күн. Себебі қазір көздерінде қуаныш, теннисшілермен суретке түсуге авторграф алуға жүгіріп жүр. 

Қазақстан теннис федерациясы салған орталықтың аумағы 5000 шаршы метр. 14 корттың төртеуі жабық. 10 ашық корттың алтауына топырақ жабындысы төселген. Сонымен қатар, жаттығу залы, медициналық бөлме, конференц-зал да бар. Нысан тәулігіне 500 адамға дейін қабылдай алады. Мұнда көп балалы және аз қамтылған отбасылар үшін жеңілдік қарастырылған. 

Диас Досқараев, Қазақстан теннис федерациясының вице-президенті:

- Бұл жерде АТР, ITF, АТF басқа да халықаралық котегориялық жарыстарын өткізуге мүмкіндік бар. бұл жерде біз оқу жаттығу жиындарына мақсат қойып отырмыз. Ендігі айда бұл жерде 14 жасқа дейін және 16 жасқа дейін құрама командалар жиындарын өткізеді. Ендігі жылы бұл жерде үш халықаралық жарыстар өткізіледі.

Елімізде 30 мыңнан астам бала тенниспен тұрақты айналысады екен. Ал Қазақстан теннис федерациясы 18 жылда отандық спортты дамытуға 200 миллион доллардан аса жеке инвестиция салған. Елімізде 2007 жылдан бері 38 теннис орталығы бой көтерген. Ал «Алатау» кешені 39-орталық атанды.

Аршын Кемелжан, Радик Жакупов