Алматыда суретші Бәтима Зәуірбекованың көрмесі ашылады

Фото: art-batima.kz

Экспозицияда суретшінің музей қорынан және отбасы архивінен алынған 80-нен астам туындысы ұсынылады. Олардың қатарында гобелендер, кескіндеме және графикалық жұмыстар бар.

Көрмені ұйымдастырушылар жиналған жұртты Бәтима Зәуірбекованың жарты ғасырдан астам уақыт бойы қалыптастырған шығармашылық мұрасымен таныстырады. Суретші ұлттық дәстүрлерді заманауи көркемдік тілмен ұштастыра отырып, отандық гобелен өнерінің дамуына зор үлес қосты. Міне, көрмеде осы туралы жан-жақты мәлімет беріледі. Сонымен бірге экспозиция арқылы дәстүрлі кілем тоқу өнері мен қазақтың ұлттық ою-өрнектерінің отандық бейнелеу өнеріндегі жаңа бағыттың қалыптасуына қалай негіз болғанын көруге болады.

Көрме төрінде – Олжас әлемі

Көрмеге келушілер үш тақырыптық бөлімнен тұратын экспозицияларды тамашалай алады.

Алғашқы залда суретшінің шығармашылығы мен қазақтың ұлттық сәндік-қолданбалы өнері арасындағы байланыс кеңінен таныстырылады.

Екінші бөлімде Бәтима Зәуірбекованың шығармашылығының негізгі бағыттары көрініс табады. Мұнда туындылар тақырыптық және көркемдік образдарына қарай топтастырылған. Ал соңғы зал қазақ мәдениетіндегі әйел бейнесіне арналған. Оның басты композициялық элементі ретінде аспалы шаңырақ орнатылып, айналасына ұлттық киім киген қазақ аруларының портреттері орналастырылады.

Бұдан бөлек, келушілер суретші туралы деректі фильмді тамашалап, архивтік фотосуреттермен таныса алады. Сондай-ақ арнайы оқу тоқыма станогында гобелен тоқу үдерісін тәжірибе жүзінде байқап көруге мүмкіндік беріледі.

Ұйымдастырушылардың айтуынша, «Мұра жіптері» көрмесі – Бәтима Зәуірбекованың шығармашылығына арналған ретроспективалық жоба ғана емес. Бұл көрме гобелен өнеріне қазіргі заманғы бейнелеу өнерінің маңызды бағыты ретінде жаңаша көзқараспен қарауға мүмкіндік береді.

Көрме өнер сүйер қауымға, зерттеушілерге, дизайнерлерге, сәулетшілерге, сондай-ақ креативті индустрия өкілдеріне арналған.

Бұған дейін хабарлағанымыздай, Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығында Ұлттық домбыра күніне орай «Қазағымның үнісің сен – домбыра!» атты көрме ашылды. Көрмедегі ең құнды жәдігерлердің бірі музей қорында сақталған Абай Құнанбайұлының домбырасы болды.

2017 жылы 29 қыркүйекте «Egemen Qazaqstan» газетінің сайтында белгілі суретші, қазақ әйелдері арасынан шыққан тұңғыш гобеленші Бәтима Зәуірбековамен «Гобелен тоқу инемен құдық қазғандай» деген тақырыппен сұхбаты шыққан еді.