Алматыда жаңа Белсенді ұзақ өмір сүру орталықтары ашылды

Алматы әкімдігінің мәліметінше, Наурызбай ауданында зейнеткерлер саны 2014 жылмен салыстырғанда 2,8 есе өскен. Қазір аудандағы қарт адамдар саны 15,2 мыңнан асады.

Сондықтан жаңа орталықтардың бірі – «Шұғыла» шағын ауданында ашылды. Онда арнайы жасалған бағдарлама бойынша қарт адамдар психологиялық және түрлі дәрістен өтеді. Егде жандар скандинавиялық серуендеуге бірге шығады, хореографияға, түрлі тренингтерге қатысады. Тіл курстары, үстел теннисі, домбыра, тоғызқұмалақ сабақтары бар.

Екінші орталық «Қалқаман-2» шағын ауданы Әшімов көшесі, 253 мекенжайында орналасқан. Бұл орталықтың бағдарламасы бойынша дене шынықтыруға, шығармашылыққа, әлеуметтік қолдауға, мәдени мұраны сақтауға ерекше назар аударылады. Ұсынылатын сабақтардың арасында йога, хореография, заңгерлік және психологиялық көмек, IT-сауаттылық, есте сақтауды нығайту, би, кескіндеме, қолөнер, вокал, актерлік шеберлік, ұлттық тағам дайындау, домбыра тарту, түрлі музыкалық жанрлар бар.

- Жаңадан ашылған екі Белсенді ұзақ өмір сүру орталығы егде жастағы жандардың бос уақытын тиімді өткізуге, өмір сүру сапасын жақсартуға, денсаулығын нығайтуға ықпал етеді, - деп хабарлады Наурызбай ауданы әкімдігі.

Жалпы Алматыда қазіргі уақытта 19 Белсенді ұзақ өмір сүру орталығы жұмыс істейді.

Еске салайық, Астанадағы Белсенді ұзақ өмір сүру орталығында күзгі сауықтыру маусымы ашылды.