Алматыда Жер сағаты акциясының аясында TURAQTY JOL 7.0 жобасының ресми ашылуы өтті

28 наурыз күні  Almaty Theatre-да «Жер сағаты» халықаралық бастамасына орай  TURAQTY JOL 7.0 ұлттық әлеуметтік эконауқанының ресми ашылуы өтті. Кештің ең маңызды бөлігі – академиялық музыка мен экологиялық күн тәртібін ұштастырған  Symphony of Earth  акустикалық концерті болды, – деп хабарлайды Aikyn.kz.

TURAQTY JOL – бұл өскелең ұрпаққа қоршаған ортаға жауапкершілікпен қарау мәдениетін қалыптастыруға бағытталған білім беру бағдарламасы. Бағдарлама мәдени, адамгершілік және экологиялық құндылықтарды дәріптеу арқылы жүзеге асырылады. Жобаның ұйымдастырушысы – Қазақстандық Ұлттық ЮНЕСКО клубтарының федерациясы, жоба ЮНЕСКО-ның Алматыдағы Өңірлік кеңсесі және Қазақстан Республикасының ЮНЕСКО және ИСЕСКО істері жөніндегі Ұлттық комиссиясының қолдауымен жүзеге асады. Эконауқанның бас серіктесі – «Банк ЦентрКредит» АҚ, ресми серіктесі – «Шеврон» компаниясы. 

Концерт unplugged форматында өтті: «Жер сағатын» қолдау мақсатында театр ғимаратындағы жарықтар сөндіріліп, бағдарлама электр энергиясын пайдаланусыз орындалды. Бұл формат табиғатты қорғау мен ресурстарды саналы пайдаланудың маңыздылығын жеткізуді мақсат етеді.

«ЦентрКредит Банкі үшін TURAQTY JOL жобасына қатысу – жай ғана экологиялық бастаманы қолдау емес. Бұл – ортақ құндылықтарға қосқан үлес: қоғам алдындағы жауапкершілік, болашаққа деген қамқорлық және саналы ұрпақты тәрбиелеу. Бүгін "Жер сағаты" акциясы  аясында  Giovani Talenti  оркестрі электр қуатын қолданбай, тірі акустикалық әуен сыйлады. Бұл әрбір дұрыс таңдау кішкентай қадамнан басталатынын тағы бір еске салды. Осындай жобалар жас буынның табиғатқа және ресурстарға деген жауапты көзқарасын қалыптастырады деп сенеміз», – деп атап өтті  Банк ЦентрКредиттің тұрақты даму (ESG) жөніндегі басқарма басшысы  Арнұр Ибраев.

Музыкалық бағдарлама барокко дәуірінен бастап, заманауи классикалық музыкаға дейінгі музыкалық тілдің эволюциясын кезең-кезеңімен бейнелейтін құрылымда ұсынылды. Бағдарламада қазақстандық композиторлардың шығармаларымен қатар, Иоганн Себастьян Бах, Антонио Вивальди, Арво Пярт, Астор Пьяццолла, Жюль Массне секілді әлемдік музыка классиктерінің туындылары орындалды.

Ахмет Жұбанов атындағы дарынды балаларға арналған республикалық қазақ мамандандырылған музыкалық мектеп-интернатының  Giovani Talenti  жасөспірімдер камералық оркестрінің бас дирижері әрі көркемдік жетекшісі Аршат Шәріптің айтуынша, бағдарламаның басты ерекшелігі – еуропалық және қазақ музыкалық дәстүрлерінің синтезі болды. Жас таланттар өнер мен тұрақты дамудың өзара үндестігін көрсетіп, экология тақырыбын дәріптеу арқылы қоғамға табиғатты аялаудың маңыздылығын жеткізді.

Концерттің солистері – мәдениет саласының танымал өкілдері: баяншы Ғалымжан Нарымбетов, скрипка өнерпазы Динара Базарбаева-Сахаман, қобызшы Айгерім Қарсақбаева және вибрафоншы Мұхаммедбатыр Балтабайұлы.

«Шеврон компаниясы Қазақстандық Ұлттық ЮНЕСКО клубтарының федерациясымен он жылдан астам уақыт ынтымақтастықта болып, экологиялық білім беру және тұрақты даму саласындағы бастамаларды қолдап келе жатыр. Біз экологиялық мәселелерді – білім беру, мәдениет, шығармашылық және жастармен диалог сияқты әртүрлі қырынан қарастыру маңызды деп санаймыз. Сондықтан биыл TURAQTY JOL 7.0 эконауқанын музыкалық шара арқылы бастау идеясы бізге ерекше қызықты болып көрінді. Мұндай формат экологиялық күн тәртібін жаңа қырынан қарауға мүмкіндік береді және жас ұрпақты Жер мен оның ресурстарына жауапкершілікпен қарауға шабыттандырады», – деді  «Шеврон Евразия» компаниясының қоғамдық байланыстар жөніндегі кеңесшісі  Жанар Кошпанова 

Эконауқанның іске қосылуы аясында Youth Eco Camp TURAQTY JOL 7.0 жобасына өтінім қабылдау басталды. Бұл бастама жастар арасында экологиялық мәдениетті дамытуға және тұрақты даму саласындағы тәжірибеге бағытталған шешімдерді қолдау болып саналады. Жобаға 14 пен 18 жас аралығындағы жасөспірімдер қатыса алады. Өтінім қабылдау мерзімі – 2026 жылғы 28 наурыз бен 28 мамыр аралығы. Қорытынды кезең 26 шілде мен 1 тамыз аралығында Алматы қаласында иммерсивті білім беру лагері форматында өтеді. Қатысушылар командалық жобалармен жұмыс істеп, арнайы оқыту бағдарламасынан өтіп, өздерінің экологиялық бастамаларын әзірлейді. Жалпы, жүлде қоры 5 миллион теңгені құрайды. Бұл үздік жобалардың әрі қарай жүзеге асуына қолдау көрсетуге мүмкіндік береді.