Алматыдағы Саин көшесінде жаңа жылдамдық шектеуі енгізілді

Алматылық жүргізушілер желіде Саин көшесіндегі жаңа жылдамдық режимі туралы хабарлады, деп жазады Tengri Auto.

Жазбаға сәйкес, енді Саин көшесімен үйреншікті сексеннің орнына сағатына 60 шақырым жылдамдықпен жүру керек.

"Міне, расталды! Саин енді сағатына 60 шақырым. Абай болыңыздар!" - делінген жазбада.

Жаңа жылдамдық шектеуі қолданушылар арасында түрлі пікір тудырды. Әсіресе, қоғамдық көлікке арналған арнайы жолақ пайда болғаннан кейін айтарлықтай өзгерген көшеге қатысты талқылау қызу жүріп жатыр.

Айта кетейік, бұған дейін әкімдік Саин көшесіндегі автобус жолағын алып тастау туралы өтінішке жауап берген еді.

Көпшілік ақпараттың анықтығына күмән келтіріп, бұрынғы жылдамдық режимі сақталғанын хабарлады:

Жаңа ғана өттім, барлық жерде 80; Фейк; Сіз TikTok-тағы ескі видеоны көрген шығарсыз.

Ал басқалары өзгерістердің шынымен бар екенін, бірақ тек көшенің жақында ашылған бөлігінде екенін жазды:

Жаңа Саин, иә! Ол жерге жақында 60 км/сағ камерасын қойды; Оңтүстік бағытта белгілердің 60-қа ауысқанына бір апта болды; Саин - Рысқұлов айрығынан Абайға дейін - нақ 60. Одан ары осы аптада жүрген жоқпын. Кері бағытта кеше әлі 80 болған. Бүгін не болатыны белгісіз. Саин көшесінде іс жүзінде не өзгерді?

Біз сағатына 60 шақырымдық шектеудің енгізілген-енгізілмегенін білу үшін Алматы әкімдігіне жүгіндік.

Алматы қалалық мобильділік басқармасының хабарлауынша, Саин көшесінің Рысқұлов даңғылынан Төле би көшесіне дейінгі аралығында қоғамдық көлікке арналған арнайы жолақты ұйымдастыру аясында жол қозғалысы сызбасы түзетілді.

Бекітілген сызбаға сәйкес, қолданыстағы қозғалыс жолақтарының ені қайта бөлініп, бұл төрт қозғалыс жолағын ұйымдастыруға мүмкіндік берді.

Жол қозғалысы қауіпсіздігін арттыру мақсатында және Саин көшесінің Райымбек даңғылы мен Төле би көшесімен қиылысындағы жол айрықтарының ерекшеліктерін (кіру және шығу жолдары) ескере отырып, аталған учаскеде максималды жылдамдықты сағатына 60 шақырымға шектеу енгізілді.

Яғни, жылдамдық режимі шынымен өзгерді, бірақ тек жоғарыда көрсетілген учаскеде ғана.

Google News арқылы жаңалықтарымызды қадағалаңыз

Жазылу