Алматыдағы стадион үшін күрес “Қайрат“ Канье Уэстке жол берді

"Қайрат" футбол клубы еурокубоктің үшінші іріктеу кезеңі аясында өз алаңындағы ықтимал матчі Алматының Орталық стадионында өтпейтінін хабарлады. Бұған 14 тамызға жоспарланған америкалық рэпер Канье Уэстің (Ye) концерті себеп болған, деп хабарлайды Tengri Life.

Клуб тиісті мәлімдемені әлеуметтік желідегі ресми парақшасында жариялады.

Матч қайда ауыстырылады?

Клубтағылар Орталық стадион концертке байланысты қолжетімсіз болатынын түсіндірді.

"14 тамызда Алматының Орталық стадионында Канье Уэсттің концерті өтетіндіктен, бұл күн клубтың еурокубоктың үшінші іріктеу кезеңіндегі ықтимал өз алаңымыздағы матчпен тұспа-тұс келіп отыр. Осыған байланысты "Қайрат" ФК-ның негізгі стадионы аталған кездесуді өткізуге қолжетімсіз болады", - делінген хабарламада.

Осыған байланысты "Қайрат" УЕФА-ға ықтимал өз алаңындағы матчінің өтетін орнын өзгерту туралы өтініш білдірді.

"Қалыптасқан жағдай мен еурокубок күнтізбесінің тығыздығын ескере отырып, клуб УЕФА-ға үшінші іріктеу кезеңіндегі ықтимал өз алаңындағы матчтің өтетін орнын ауыстыру туралы өтініш жолдады. Өтініш қаралғаннан кейін кездесуді Түркістан қаласындағы "Түркістан Арена" стадионында өткізуге келісім берілді", - деп мәлімдеді клуб.

Сондай-ақ клуб матчтің күні, басталу уақыты және билеттерді сату туралы ақпарат команданың еурокубоктегі алдағы жолы анықталғаннан кейін жарияланатынын хабарлады.

Instagram-дағы бұл жарияланымды көру

«Қайрат» ФК | FC Kairat Almaty (@f.c.kairat) жарияланымы

Мән-жайы

Бірнеше күн бұрын "Қайрат" ФК бұған қарама-қайшы мәлімдеме жасаған болатын. Ол кезде клуб концерттің белгіленген күні - 14 тамыз Орталық стадионда өз алаңығдағы матчарін өткізетін және еурокубоктердегі өнерін жалғастырып жатқан командамен келісілмегенін айтқан еді.

Клуб Қазақстан премьер-лигасы күнтізбесіне сәйкес, "Қайрат" 8 және 15 тамызда чемпионаттың өз алаңығдағы матчтерін өткізуі тиіс екенін, ал 11-13 тамыз аралығында еурокубоктің үшінші іріктеу кезеңі матчі өтуі мүмкін екенін еске салған болатын.

Клуб мұндай ауқымдағы концерт сахна мен техникалық жабдықтарды ұзақ уақыт бойы монтаждау мен бөлшектеу қажет ететініне, бұл көгалдың жағдайына, аренаның дайындығына және ресми матчтердің өтуіне әсер етуі мүмкін екеніне ерекше назар аударған еді.

Сол кезде "Қайрат" Орталық стадионда бұқаралық іс-шараларды ұйымдастыру тек барлық мүдделі тараппен келісілгеннен кейін және бекітілген футбол күнтізбесін ескере отырып жүргізілуі тиіс екенін, ал бұл процедуралар аяқталғанға дейін стадионды концерт өтетін орын ретінде жариялауды мерзімінен бұрын деп атаған.

Instagram-дағы бұл жарияланымды көру

«Қайрат» ФК | FC Kairat Almaty (@f.c.kairat) жарияланымы

Ал Спорттық құрылыстар дирекциясының баспасөз қызметі сол кезде қажетті келіссөздер мен мақұлдау жұмыстары жүргізіліп жатқанын хабарлаған еді. Бірнеше күн өтсе де, стадион мен концертке қатысты мәселе шешілмеген болатын, ал Канье Уэстің Алматыдағы өнеріне билеттер сатылымы кейінге қалдырылды.

Алайда енді клуб еурокубок аясында өз алаңындағы матчі Алматыда емес, Түркістанда өтетінін растады.

Канье Уэстің концерті туралы не белгілі?

Америкалық рэпер Канье Уэстің Алматыдағы концерті туралы әртістік фан-парақшаларының біріндегі жазбадан кейін белгілі болды. Хабарламада концерт 2026 жылдың 14 тамызында өтетіні, ал билеттерді сату 20 шілдеде басталатыны айтылған.

Кейін дәл осындай аңдатпа кәсіпкер және Karre Ventures пен ML1 Records негізін қалаушы Джозеф Карренің парақшасында пайда болды, содан кейін концерт туралы ақпаратты Алматы әкімдігі растады.

Instagram-дағы бұл жарияланымды көру

FMG - маркетингтік холдингінің жазбасы (@firstmediagroup)

Концерт Ye әлемдік турының бір бөлігі болмақ. 2026 жылы әртіс Мексикада өнер көрсетіп үлгерді және Еуропадағы бірқатар ірі стадиондық концертті жариялады. Рэпердің соңғы шоулары үлкен сфералық сахнасы бар ауқымды қойылыммен, жарық және түтін эффектілерімен сүйемелденеді, ал оның өнер көрсеткен видеолары әлеуметтік желілерде танымал болып жатады.

Орталық стадион бұған дейін де дау нысанына айналған

Алматының Орталық стадионында ірі концерттер өткізу төңірегіндегі даулар бірінші рет туындап отырған жоқ.

Мәселен, былтыр америкалық әнші Дженнифер Лопестің концертіне қатысты осындай жағдай болған. Аңдатпадан кейін "Қайрат" ФК концерт күні клубпен келісілмегенін мәлімдеді, өйткені бұл кезеңге Қазақстан чемпионаты мен еурокубок матчтері жоспарланып қойған болатын. Клуб УЕФА талаптары бойынша стадионды ойындарға дайындау аренада басқа бұқаралық іс-шараларды өткізуге мүмкіндік бермейтінін атап өткен еді.

Кейін концерт ұйымдастырушылары, "Қайрат" басшылығы және Алматының спорттық ғимараттар дирекциясы ортақ мәмілеге келді. "Қайрат" пен "Жеңіс" арасындағы Қазақстан премьер-лигасының матчі басқа күнге ауыстырылды, соның арқасында Дженнифер Лопестің концерті бұрын жарияланған мерзімде өтті.

Беларусьтік орындаушы Макс Корждың 6 қыркүйекте Орталық стадионда өтуі тиіс болған концертіне қатысты оқиға бұдан да үлкен резонанс тудырды. Ұйымдастырушылар шоуды он айға жуық дайындағандарын, Спорт ғимараттары дирекциясымен келісімшарт жасап, алдын ала төлем жасағандарын, қажетті келісім алғандарын, ал билеттер көктемде сатылымға шыққанын мәлімдеді. Олардың мәліметінше, концертке 35 мыңға жуық билет сатылған, ал Алматыға 17 мыңнан астам турист келеді деп күтілген.

Дегенмен іс-шараға бірнеше күн қалғанда концерт өтпейтін болды. Спорт ғимараттары дирекциясы бұл шешімді стадионды "Қайраттың" УЕФА Чемпиондар лигасындағы матчтеріне дайындау қажеттілігімен, құжаттардың толық пакеті жоқтығымен, сондай-ақ концерттердің жиі өткізілуі футбол алаңы жағдайына кері әсер ететіндігімен түсіндірді.

Әртістің командасы мұндай ұстаныммен келіспеді. Ұйымдастырушылар стадионмен қолданыстағы келісімшартқа наурызда қол қойылғанын, алдын ала төлем жасалып, қажетті рұқсат алынғанын мәлімдеді. Олардың айтуынша, көгалды қорғау үшін арнайы жабын пайдалану жоспарланған, ал футбол матчтеріне дейін алаңды қалпына келтіруге уақыт жеткілікті болған. Соған қарамастан, концерт белгіленген күнге үш күн қалғанда өтпейтін болды, содан кейін ұйымдастырушыларға билеттер ақшасын қайтаруға тура келді.

Google News арқылы жаңалықтарымызды қадағалаңыз

Жазылу