Алматылық дәрігерлер салмағы 700 грамм болып туған нәрестені аман алып қалды

Алматы қалалық №2 перинаталдық орталығында дәрігерлер салмағы небәрі 742 грамм болып дүниеге келген сәбидің өмірін сақтап қалды, – деп хабарлайды Aikyn.kz қала әкімдігіне сілтеме жасап. 

Бала 2025 жылғы 30 тамызда, жүктіліктің 26-аптасында дүниеге келген.

Туғаннан кейін оның жағдайы аса ауыр болды, сондықтан дәрігерлер ұзақ әрі күрделі күтім процесін бастады.

40 күн бойы сәби өкпені жасанды желдету (ӨЖЖ) аппаратында, кейін 24 күн назальды СИПАП-терапияда болып, соңғы 10 күн өздігінен дем ала бастаған.

Қазір сәбиге 74 күн болды, ол құрылғысыз өздігінен тыныстап жатыр.

Мұндай жағдай бүкіл ұжымнан – неонатологтерден, реаниматологтерден, медбикелер мен перинаталдық психологтерден жоғары кәсіби дайындық пен шыдамдылықты талап етеді.

«Әрбір грамм салмақ, әрбір тыныс – дәрігерлердің ортақ еңбегі мен сәбидің өмірге деген жігерінің нәтижесі. Бұл біз үшін жай ғана медициналық жұмыс емес, күн сайынғы өмір үшін күрес», – деді Алматы қалалық №2 перинаталдық орталығы директорының неонаталдық қызмет жөніндегі орынбасары Айнұрым Сарбас.

Сәбидің анасы ұлын аман алып қалған дәрігерлер мен мейірбикелерге алғыс білдіріп, олардың қолдауы мен қамқорлығы ең қиын сәтте үлкен демеу болғанын айтты.

Бүгінде Алматы қалалық №2 перинаталдық орталығы шала туған балаларды күтіп-баптаудың заманауи әдістерін белсенді енгізіп келеді.

Жыл басынан бері орталықта салмағы 1 000 грамнан төмен 43 сәби өмірге қайта оралды.