Алматының бюджет кірістері биыл алғаш рет 2,3 трлн теңгеден асады

Алматы әкімінің орынбасары Олжас Смағұловтың айтуынша, мұндай нәтижеге жоғары іскерлік белсенділік, инвестициялар көлемінің артуы, салық түсімдерінің өсуі және шағын және орта бизнестің белсенділігі себеп болған.

2025 жылдың 9 айының қорытындысы бойынша жергілікті бюджеттің кірістері 1,6 трлн теңгеге жетіп, былтырғымен салыстырғанда 19,3% артқан.

Негізгі үлес келесі салықтарға тиесілі:

• жеке табыс салығы — 618 млрд теңге (+24,3%);
• корпоративтік табыс салығы — 501 млрд теңге (+10,3%);
• әлеуметтік салық — 323 млрд теңге (+23,4%).

Әсіресе шағын бизнестің үлесі айтарлықтай артқан, олардан түскен салықтар 30% өсіп, 670 млрд теңгеге жеткен. Ірі бизнес 492 млрд теңге (+17%) төлеген, ал орта бизнес былтырғы деңгейін сақтаған.

Олжас Смағұловтың айтуынша, Алматы бүгінде елдің басты инвестициялық орталықтарының бірі мәртебесін нығайтып келеді.

2025 жылдың қаңтар-қыркүйек айларында негізгі капиталға салынған инвестициялар 1,5 трлн теңгеге жетіп, 20,7% өскен. Жеке инвестициялар да 1,1 трлн теңгеге дейін ұлғайған.

— Жыл соңына дейін негізгі капиталға инвестиция көлемін 2,3 трлн теңгеге дейін жеткізу жоспарланып отыр. Бұл көрсеткіш қала үшін абсолюттік рекорд болмақ, — деді Олжас Смағұлов.

Қалада бүгінде жалпы құны 3,6 трлн теңгеден асатын 189 жоба жүзеге асырылып жатыр. Олар шамамен 33 мың жаңа жұмыс орнын құруға мүмкіндік береді.

Еске салайық, бұған дейін Алматыда қала бюджеті 3,6 млрд теңгеге азайтылып, 2025 жыл үшін бюджет 2 трлн 508,4 млрд теңге болатыны айтылған еді.