Алты адам қаза тауып, біреуі тірі қалды Павлодар облысындағы сүт фермасында болған төтенше жағдай туралы не белгілі

Павлодар облысы Жоламан ауылындағы сүт фермасы аумағындағы төтенше жағдай салдарынан алты адам қаза тауып, тағы бір адам ауруханаға түсті. Қайғылы оқиғаға қатысты тергеу басталды, - деп хабарлайды Tengrinews.kz.

Қайғылы жағдай жергілікті ірі сүт кәсіпорны аумағында болған. Әлеуметтік желілерде тараған ақпаратқа сүйенсек, алты адам кәріз құдығындағы жөндеу жұмыстары кезінде қаза тапқан. Алайда бұл мәлімет әзірге ресми түрде расталған жоқ.

Анықтама: Кәріз коллекторы (құдығы) - бұл үйлерден, кәсіпорындардан және басқа да нысандардан келетін ағын сулар өтетін су бұру жүйесінің бір бөлігі. Қарапайым тілмен айтқанда, бұл - мамандар кәріз желілерін тексеру, тазалау және жөндеу үшін түсе алатын жерасты камерасы немесе шахтасы.

"Жоламан ауылындағы сүт фермасы аумағында алты адам қаза тапты. Оқиғаның себептері мен адам өлімінің мән-жайы анықталып жатыр", - деп түсініктеме берді Tengrinews.kz тілшісіне Еңбек және халықты әлеуметтік қорғау министрлігі Мемлекеттік еңбек инспекциясы комитетінің Павлодар облысы бойынша департаменті.

Облыстық жедел жәрдем станциясы мәліметінше, шақырту 20 шілдеде сағат 12.01-де түскен.

"Оқиға орнында жедел жәрдем дәрігерлері 1963, 1975, 1983, 1998, 2006 және 2009 жылы туған алты ер адамның қаза болғанын растады", - деп хабарлады Павлодар облыстық жедел медициналық жәрдем станциясы.

Тағы бір зардап шеккен 38 жастағы ер адам қазір Ақтоғай аудандық ауруханасында жатыр.

"1988 жылы туған науқас көмірқышқыл газымен орташа дәрежеде улану диагнозымен ауруханаға жатқызылды. Қажетті медициналық көмек көрсетіліп жатыр, облыс орталығына тасымалдауды қажет етпейді", - деп мәлімдеді аймақтық Денсаулық сақтау басқармасы.

Адам өлімі дерегі бойынша соталды тергеп-тексеру амалдары басталды. Аймақтық Полиция департаментінің баспасөз қызметі Қылмыстық іс жүргізу кодексінің 201-бабына сәйкес өзге ақпарат жарияланбайтынын атап өтті.

Кәріз құдықтары жұмыс жүргізу үшін ең қауіпті орындардың бірі саналады

Мұндай құрылыстардың ішінде қауіпті газдар жиналуы мүмкін:

күкіртсутек - органикалық қалдықтардың ыдырауы кезінде түзіледі. Жоғары концентрацияда ол естен тануға және тыныстың тоқтауына әкеп соғуы мүмкін; метан - оттегін ығыстырып шығаратын жанғыш газ; көмірқышқыл газы - көп мөлшерде жиналып, тұншығуға әкелуі мүмкін.

Ауаны арнайы тексерістен өткізбей және тиісті жабдықсыз құдыққа түскен адам бірнеше минуттың ішінде есінен танып қалуы мүмкін. Көбіне мұндай трагедиялар "тізбек реакциясы" бойынша болады: бір жұмысшы ішке түсіп, жағдайы нашарлайды, ал оны құтқармақ болған әріптестері де уланып қалады.

Google News арқылы жаңалықтарымызды қадағалаңыз

Жазылу