ALTYN ORDA турнирінде 18 елден келген 200 ден астам мерген бақ сынауда

Олардың қатарында Венгрия, Өзбекстан, Иран, Үндістан, Корея Республикасы, Ұлыбритания, Франция, Марокко және басқа да мемлекеттерден сұр мергендер бар.

Турнирдің басты мақсаты — дәстүрлі садақ атуды насихаттау, ұлттық спорт түрін дамыту, шеберлікті шыңдау және халықаралық деңгейде тәжірибе алмасу.

Жарыстың ресми ашылуында облыс әкімі Болат Ақшолақов сөз сөйлеп, қатысушыларға ілтипатын білдірді. Аймақ басшысы жарыстың Атырауда өтуінде ерекше мән-мағына барын атап айтты.

Сурет: Атырау облысы әкімінің баспасөз қызметі

"Атырау — Алтын Орда дәуірімен тікелей байланысты, терең әрі бай тарихы бар қасиетті мекен. Осы жерде орналасқан көне Сарайшық қалашығы ұлттық тарихымызда ерекше орын алады, сондықтан дәстүрлі садақ ату бойынша Әлем кубогының Атырауда «ALTYN ORDA» атауымен өтуінің ерекше символдық мәні бар. Бұл жай ғана спорттық жарыс емес, бұл тарихымызға құрмет көрсету, ұлттық өнерімізді жаңғырту және садақ атуды әлемге Ұлы Даланың мұрасы ретінде таныстыру жолындағы маңызды қадам. Бүгінде өңірде дәстүрлі садақ атудың материалдық-техникалық базасын нығайту және спортшыларды даярлауға жағдай жасау бағытында кең ауқымда жұмыс жүріп жатыр. Біздің басты мақсатымыз — ұлттық спортты дамытуға қолайлы жағдай жасап қана қоймай, Атырауда әлемдік дәрежедегі жаңа чемпиондарды тәрбиелеп шығару. Мергендерімізге сәттілік, дәлдік пен жеңіс тілеймін!", —деді Болат Ақшолақов.

Сурет: Атырау облысы әкімінің баспасөз қызметі

Өңірде дәстүрлі садақ атуды дамытуға айрықша назар аударылып отыр. Бүгінде облыста спорттың бұл түрімен 100-ден астам адам тұрақты айналысады. Олардың қатарында екі халықаралық дәрежедегі спорт шебері, сегіз ҚР спорт шебері және 25 спорт шеберіне үміткер бар.

Өңір басшысы іс-шара шеңберінде VI Дүниежүзілік көшпенділер ойындарында жоғары нәтиже көрсеткен Атырау облысының спортшыларына алғысхат табыстады. Олардың сапында көкпардан күміс жүлде еншілеген Абылай Ұлықпанов пен дәстүрлі садақ атудан қола жүлде иегері Әли Сесигюзель бар.

Сурет: Атырау облысы әкімінің баспасөз қызметі

Жарыстың бірінші күні "Пута" нысанасы бойынша ерлер мен әйелдер арасында іріктеу кезеңдері өтті. Ерлер арасында үшінші орынды Забит Сатоев иеленсе, әйелдер арасындағы қола жүлде ресейлік Миляуша Халиловаға бұйырды. Ертең спортшылар "Қалқан" нысанасы бойынша жүлдені сарапқа салады.

Сурет: Атырау облысы әкімінің баспасөз қызметі

Сұрмергендер сайысы 15 қыркүйекке дейін созылады. Спортшылар бірнеше күн бойы дәстүрлі садақ атудың түрлі нысанасы бойынша бақ сынайды. Олардың өнерін халықаралық төрешілер бағалайды.