Атыраулық мерген республикалық садақ ату турнирінде жеңіске жетті

Жылыой ауданында екі күнге созылған дәстүрлі республикалық ашық садақ ату турнирі өз мәресіне жетті, деп хабарлайды Өңірлік коммуникациялар қызметі. 

Жарысқа Қазақстанның 12 өңірінен, сондай-ақ Өзбекстан мен Ресейден келген 100-ден астам спортшы қатысты. Үш нысан бойынша өткен сайыстың қорытындысында жүлделі орындар иелеріне табыс етілді.

Ерлер арасында «Пута» нысанында ақтөбелік Нұрлан Баймаханов, әйелдер арасында маңғыстаулық Мадина Мурадова үздік шықты. «Қалқан» нысанында жеңімпаздар шымкенттік Жәнібек Құлмырзаев пен елордалық Айкөркем Батихан, ал «Жамбы атудан» атыраулық Али Сесигюзел мен Айкөркем Батихан топ жарды.

Атыраулық мерген Али Сесигюзел:

- «Садақ ату ұлттық спортымен алғашында әуесқой деңгейде айналысып, соңғы 5 жылдан бері кәсіби түрде шұғылданамын. 2024 жылы Шымкент қаласында өткен халықаралық турнирде дәл осы «Жамбы атудан» жеңіп, халықаралық деңгейдегі спорт шебері атандым. Жарыс өте жоғары деңгейде өтті, алдағы уақытта да өңірге жеңіс әкелуді жоспарлап отырмын», – деді.

Турнирдің жалпы жүлде қоры 4,2 млн теңгені құрап, жеңімпаздар мен жүлдегерлер арнайы дипломдармен марапатталды.

Бүгін, 14:11