AMANAT партиясы Әділетті Қазақстанның цифрлық дәуірін қалыптастырып жатыр

Қарағандыда Республика күніне орай «SARYARQALAB: AQYL.DAMU.QADAM» атты жастар форумы өтті. Іс-шараның мақсаты – жастардың жасанды интеллект пен цифрландыруға қызығушылығын арттыру, экологиялық мәдениетті дамыту және Әділетті Қазақстанды құру жолындағы жас патриоттарды тәрбиелеу. Форумның бастамашысы әрі ұйымдастырушысы – «AMANAT» партиясының Қарағанды облыстық филиалы.

Ауқымды жиынға аймақтың 600-ден астам белсенді әрі креативті жастары – жоғары оқу орындары мен колледждердің студенттері, сондай-ақ Приозерск, Саран, Теміртау, Шахтинск қалалары мен Қарағанды облысы аудандарынан келген жастар қатысты. Бағдарламада экскурсиялар, шеберлік сағаттары, тренингтер мен цифрлық технологиялар және жасанды интеллект тақырыптарына арналған сессиялар ұйымдастырылды.

Форум жұмысына Қарағанды облысының әкімі Ермағанбет Бөлекпаев, облыстық мәслихат төрағасы Нұркен Кобжанов, «AMANAT» партиясы облыстық филиалының төрағасы Бекзат Алтынбеков, депутаттар, мемлекеттік органдар мен қоғамдық ұйымдардың өкілдері және «Жастар Рухы» жастар қанатының төрағасы Ақерке Искандерова қатысты.

Облыс әкімі Ермағанбет Бөлекпаев өңірдің дамуына жастардың қосып отырған үлесін атап өтіп, бүгінде аймақ тұрғындарының төрттен бірі – жас буын екенін жеткізді.

«Мемлекет басшысы «жастар – жаңа экономикалық дамудың қозғаушы күші» екенін атап өткен еді. Бүгінде сіздер – жасанды интеллект пен цифрлық технологияларды меңгеріп, экологиялық және құқықтық ой-өрісі қалыптасқан Қазақстанның болашағысыздар. Мемлекет сіздерге гранттар беріп, идеяларыңызды, стартаптарыңызды жүзеге асыру үшін барлық жағдай жасап отыр. «Жасыл ел», қолжетімді ипотека бағдарламалары, менторлық жобалар – мұның бәрі сіздердің болашақтарыңызға бағытталған инвестиция», – деді ол. 

«Жастар Рухы» жастар қанатының төрағасы Ақерке Искандерова форумның Мемлекет басшысы айқындаған басымдықтарды жүзеге асыруға бағытталғанын айтты.

«Президент Қасым-Жомарт Тоқаев 2029 жылға дейін кемінде 2,3 миллион жасты жұмыспен қамту міндетін қойды. «Жастар Рухы» 100 мыңнан астам белсенді жасты біріктіріп, жұмыспен қамту, кәсіби бағдар және азаматтық тәрбие бағытында жүйелі жұмыс жүргізіп келеді. Біз инновациялық шешім ұсынуға және елге қызмет етуге және Әділетті Қазақстанды бірге құруға дайын буынды қалыптастыруға күш саламыз», – деді Ақерке Искандерова.

Ол сондай-ақ 2025 жылдың Жұмысшы мамандықтары жылы болып жарияланғанын еске салып, еңбек адамының беделін арттыруға ерекше көңіл бөлінетінін айтты. Форум аясында жасанды интеллектті дамыту мәселесіне айрықша назар аударылды. Президент Қасым-Жомарт Тоқаев Қазақстан халқына Жолдауында экономиканың барлық саласын жаңғырту үшін жаппай жасанды интеллектіні енгізу қажет екенін атап өткен болатын. «AMANAT» партиясы жасанды интеллектті экономикаға, білім беру мен әлеуметтік салаға интеграциялау жөніндегі бастамаларды қарқынды түрде жүзеге асырып келеді.

«AMANAT» партиясы облыстық филиалының төрағасы Бекзат Алтынбековтің айтуынша, жастар тек технологияны тұтынушы емес, оны жасаушы болуға тиіс.

«AMANAT» партиясы қазірдің өзінде ІТ және цифрландыру саласында ауқымды жобаларды іске асыруда. Олардың қатарында – цифрлық сауаттылықты арттыру бойынша «Цифрлық қоғам» жобасы, интернет қауіпсіздігіне арналған «Кибер Тұмар», сондай-ақ жер қатынастарындағы ашықтықты қамтамасыз ететін jerkarta.gharysh.kz геосервисі бар. Бұл бастамалар – Президенттің техноұлт қалыптастыру және әділетті цифрлық мемлекет құру жөніндегі идеяларының нақты көрінісі», – деді ол.

Форумда жасанды интеллект саласындағы сарапшылар да баяндама жасады. Сарапшы Есқали Қыдырмолданов заманауи технологиялардың креативті идеяларды жүзеге асыруға және еңбек өнімділігін арттыру жолдарын таныстырды. «Quantumhub» тұрақты даму және креативті индустриялар ғылыми-зерттеу орталығының директоры Жәнібек Жартайдың айтуынша, АҚШ және өзге елдерде студенттердің 90%-ға жуығы оқу үдерісінде жасанды интеллектті пайдаланады, ал Қазақстанда бұл үрдіс енді қарқын алып келеді. «Террикон алқабы» экожүйесінің басқарушы серіктесі Диана Салехова форум қатысушыларын өңірлік ІТ-хабтың мүмкіндіктерімен таныстырып, жас мамандарды өз стартаптарын осы алаңда жүзеге асыруға шақырды.

Форумның маңызды тақырыптарының бірі – экологиялық тәрбие мен табиғатты аялау мәдениетін дамыту болды. Теміртаудағы «Жасыл ел» жасақтарының үйлестірушісі Мирас Яуда әрбір жастың табиғатты қорғауға қосқан үлесі қоршаған ортаның тепе-теңдігін сақтауда айрықша мәнге ие екенін айтты. 

Форум соңында Республика күніне орай ең белсенді әрі талантты қатысушыларға «Жастар Рухы» төрағасы Ақерке Искандерова алғыс хат және облыстық мәслихат депутаты Асқар Оразбеков қаржылай гранттар табыс етті. Бұл гранттар өз ісін бастағысы келетін жас кәсіпкерлердің инновациялық және әлеуметтік маңызы бар жобаларын қолдауға бағытталған. 

«AMANAT» партиясы жастарға ғылым, кәсіпкерлік және волонтерлік сияқты түрлі бағытта өз әлеуетін танытып, армандарын іске асыруға кең мүмкіндік береді. Ел дамуына әрқайсыңыз үлес қоса аласыздар. Осындай форумдар Қазақстанның болашағы сенімді қолда екенін дәлелдейді», – деді Асқар Оразбеков.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.