Әмбебап банктерде ислам терезелері ашылады

Қазақстанда қаржыландырудың балама тетігі ретінде исламдық банкингті дамыту үшін құқықтық база құрылады.
Бұл туралы Парламент Мәжілісінде «Қазақстан Республикасындағы банктер және банк қызметі туралы» және «Қазақстан Республикасының кейбір заңнамалық актілеріне қаржы нарығын реттеу және дамыту мәселелері бойынша өзгерістер мен толықтырулар енгізу туралы» заң жобаларының бірінші оқылымында Қаржы нарығын реттеу және дамыту агенттігінің төрағасы Мәдина Әбілқасымова хабарлады.

«Қаржыландырудың балама тетіктерін дамыту үшін әмбебап банктерге қолда бар лицензия шеңберінде исламдық банк операцияларын жүзеге асыру құқығын беру көзделеді. Бұл нормалар банктерге жеке банкті құрмай, өз құрылымында арнайы бөлімшелер құру арқылы исламдық өнімдерді ұсынуға мүмкіндік береді», - деп атап өтті Агенттік Төрағасы.

Бұдан басқа, заң жобасында исламдық банкингті ұйымдастырушылық тұрғыдан оқшаулау, активтер мен міндеттемелерді бөлек есепке алу және басқару, жеке қызметкерлерді бөлу, сондай-ақ қаржы өнімдерін бекітетін және аудит жүргізетін шариғатқа сәйкестік жөніндегі кеңестің міндетті түрде болуы көзделген.

Банктер туралы жаңа заңда технологиялық өзгерістер, экономиканы қаржыландырудағы банк секторының рөлін арттыру, нарыққа жаңа қатысушыларды тарту, сондай-ақ қаржылық технологияларды ілгерілету және цифрлық активтер айналымын ырықтандыру мәселелері ескерілген.