АМӨЗ санитарлық аймағынан көшіру 2027 жылы басталады

АМӨЗ-де мерзімдер нақтыланды: жер мәселелерін рәсімдеу, үйлерді бағалау және төлемдерді дайындау қараша айында басталады, ал жаңа санитарлық-қорғау аймағынан тұрғындарды нақты көшіру келесі жылға жоспарланған.

Бұл туралы экологиялық брифингте АМӨЗ-дің еңбек қорғау, қоршаған орта және азаматтық қорғау департаментінің міндетін атқарушы Арман Димукашев мәлімдеді.

Оның айтуынша, қазір зауыттың санитарлық-қорғау аймағының нақтыланған шекаралары бойынша жерге орналастыру рәсімдері аяқталуда. Жаңа аумақтың көлемі бұрынғы 805 гектардың орнына 965 гектарды құрайды.

Димукашев санитарлық-қорғау аймағының аумағының ұлғаюы өндірісті кеңейтумен немесе жаңа технологиялық нысандарды енгізумен байланысты емес екенін атап өтті.

— Бұрынғы санитарлық-қорғау аймағы анықталғаннан кейін ешқандай қосымша нысандар салынған жоқ, жаңа технологиялық объектілер пайдалануға берілген жоқ. Атмосфералық ауаға әсер деңгейі өзгерген жоқ, — деп түсіндірді ол.

Оның айтуынша, жаңа шекараларды арнайы ұйым қолданыстағы эмиссияларды және жел бағытын ескере отырып анықтаған. Қазір жоба заңнамада көзделген рәсімдерден өтуде.

Келесі кезең санитарлық-қорғау аймағына кіріп кеткен үйлерге қатысты болады. Қараша айында жер мәселелерін рәсімдеу және жылжымайтын мүлікті бағалау басталмақ. Бұл жұмысқа қалалық әкімдік те қатысады.

Қажетті рәсімдер аяқталғаннан кейін тұрғындарға өтемақы ұсынылады, ал көшіру 2027 жылға жоспарланған. Брифингте хабарланғандай, қаржыландыруды «ҚазМұнайГаз» және АМӨЗ қамтамасыз етеді.

Процессті — рәсімдеу, бағалау, төлемдер мен көшіруді шамамен 2028 жылға қарай толық аяқтау көзделіп отыр.

Анастасия ШЕРСТЯНКИНА

18 қыркүйек, 14:48