Apple iPhone, iPad және Mac тапшылығы болуы мүмкін екенін ескертті

Apple компаниясы iPhone, iPad және Mac тапшылығына тап болуы мүмкін. Бұған құрылғыларға сұраныстың болжамнан әлдеқайда жоғары болуы және нарықта жекелеген жиынтықтауыш бөлшектердің жетіспеуі себеп болып отыр. Бұл туралы үшінші қаржылық тоқсанның қорытынды есебі кезінде Apple бас директоры Тим Кук айтты, деп хабарлайды Tengri Life MacRumors-ке сілтеме жасап.

Apple басшысының айтуынша, компания жеткізу мәселесі бұдан да күрделене түседі деп болжайды.

"Біз сұраныс деңгейі жоғары болады деп болжап отырмыз. Дегенмен, жеткізу тізбегіндегі икемділіктің төмендігін ескере отырып, жеткізуге қатысты шектеулер әсері алдағы уақытта айтарлықтай артады деп күтеміз", - деді Тим Кук.

Неге тапшылық туындауы мүмкін?

Тим Кук қиындықтар зауыттардағы іркілістен емес, гаджеттердің жоспарланғаннан әлдеқайда белсенді сатып алынуынан туындағанын түсіндірді. Мысалы, iPhone мен Mac сатылымы Apple күткеннен әлдеқайда жақсы болған.

"Тағы бір рет баса айтқым келеді. Бұл серіктестердің немесе жеткізушілердің мәселесі емес... Бұл - iPhone мен Mac сатылымының керемет табысты циклі, ол шын мәнінде біз күткеннен асып түскен сұранысқа әкелді", - деп атап өтті ол.

Жад нарығы да қосымша қысым көрсетіп отыр. Куктың айтуынша, маусымда аяқталған тоқсанда Apple жадқа алдыңғы тоқсанға қарағанда көп төлеген, ал алдағы айларда шығын бұдан да жоғары болуы ықтимал.

Apple шығынның артуын қалай тежемек?

Компания бұл жағдайды екі жолмен жеңілдетуді көздеп отыр.

Біріншісі - жинақталған құрамдас бөлшектер қорын пайдалану.

"Қыркүйектегі тоқсанда біз қоймадағы белгілі бір қор пайдасын көрдік. Дегенмен, уақыт өте келе, қыркүйек тоқсанынан кейін бұл пайда азаяды деп есептейміз", - деді ол.

Екіншісі - жадқа жатпайтын кейбір жиынтықтауыш бөлшектер құнының төмендеуіне сенім арту.

"Біз жадқа жатпайтын кейбір бөлшектердің өзіндік құны төмендейді деп күтеміз. Сонымен қатар қыркүйектен кейінгі жағдайға қарасақ, жадтың нарықтық бағасы көтеріліп, біздің бизнеске көп әсер етіп жатқанын көреміз", - деді Тим Кук.

Жад тапшылығы басты мәселе болып қала бермек

Тим Кук қазір DRAM нарығын іс жүзінде үш ірі өндіруші бақылап отырғанын айтты. Оның пікірінше, жаңа ойыншылардың пайда болуы жеткізу жағдайын жақсартуға көмектесіп, бағаға әсер етуі мүмкін еді.

"DRAM нарығында үш жеткізуші бар. Егер жеткізушілер көп болса, бұл бізге жеткізу тұрғысынан да, бәлкім, баға белгілеу тұрғысынан да жақсы болар еді. Бағаға қатысты әзірге белгісіз, бірақ бұл жеткізуге көмектесуі мүмкін. Сондықтан біз барлық нұсқаны қарастырып жатырмыз", - деді ол.

Жад нарығындағы мәселелер жалғасып келе жатқанына бірнеше жыл болды. Бұған дейін Jefferies сарапшылары жедел жад бағасының күрт өсуін болжаған болатын: 2026 жылдың аяғына қарай оның бағасы екі еседен аса, ал 2027 жылы тағы да жартысына жуық қымбаттауы мүмкін. Осыған байланысты смартфондар мен ноутбуктердің де бағасы өсетіні сөзсіз, ал мамандар нарықтағы жағдайдың қалыпқа келуін 2028 жылдан ерте күтпейді.

Тағы оқыңыз: iPhone жаңартудан кейін қыза бастады: өшіру керек 5 функция аталды

Google News арқылы жаңалықтарымызды қадағалаңыз

Жазылу