Ақмола облысында дамба бұзылды: жол қызметі трассаны су баспағанын хабарлады

Ақмола облысында бөгет бұзылды, куәгерлер Астана - Қорғалжын тасжолының бір бөлігін еріген қар суы шайып кеткенін хабарлады. Жағдайға қатысты "ҚазАвтоЖол" түсініктеме берді, деп хабарлайды Tengrinews.kz.

Ақмола облысында бөгет бұзылды, куәгерлер Астана - Қорғалжын тасжолының бір бөлігін еріген қар суы шайып кеткенін хабарлады. Жағдайға қатысты "ҚазАвтоЖол" түсініктеме берді, деп хабарлайды Tengrinews.kz.

"ҚазАвтоЖолдың" мәліметінше, Қорғалжын ауданындағы Сабынды ауылының маңында "Шөптікөл" бөгеті бұзылып, салдарынан су алқаптар арқылы елді мекен бағытына жайылып жатыр.

Ведомство су ағыны Астана - Қорғалжын республикалық тасжолының 75-шақырымынан өтіп жатқанын нақтылады.

"Су жолдың жүру бөлігіне жайылған жоқ. Қазіргі уақытта Ақмола облыстық филиалының жол қызметтері ахуалды тұрақтандыру бағытында жедел шаралар қабылдауда. Жұмыстарға 14 бірлік арнайы техника мен 30-дан астам жол маманы тартылған. Инертті материалдарды дайындау және оларды жеткізу жұмыстары жүйелі түрде жүргізілуде", - деп хабарлады "ҚазАвтожолдан".

Аталған учаскеде үш көзді су өткізу құбыры қалыпты режимде жұмыс істеп, судың толық көлемде кедергісіз өтуін қамтамасыз етуде.

"Жол төсемі бүтін, автокөлік қозғалысы ашық", - деп сендірді "ҚазАвтоЖолдағылар".