Ақмола облысында экоакцияда 80 түп ағаш егілді

Ақмола облысы Шортанды ауданының орталығындағы жастар саябағы қоқыстан тазартылып, айналасы ретке келтірілді.

80 түп ағаш егіліп, көгалдандыру жұмысы жүргізілді. Тазалық шарасы «Таза Қазақстан» экологиялық акциясы аясында өтті. Оған еріктілер мен тұрғындар жұмыла атсалысты. 

Шортандылықтар экологиялық акцияда ерекше белсенділік танытты. Жастар саябағының аумағына көшеттер егіп, абаттандыру жұмысын жүргізді. Жергілікті жастар тазалық акцияларына  тұрақты түрде қатысады.

Күнсұлу Малшыбай, волонтёр:

- Акция барысында біз Шортанды ауданының көшелерін тазалап және артық қоқыстарды шығарып, ауданымызды көркейтуге кішкене болса да үлесімізді қосамыз. «Таза Қазақстан» акциясы қазір мемлекетімізде өте белең алып жатқан акциялардың бірі.

Күш сынасу экстримінен бірнеше дүркін әлем рекордсмені Сергей Цырульников та бүгін еріктілер қатарында. Ол кейінгі жастарға үлгі болып, қала тазалығына үлесін қосты.

Сергей Цырульников, күш сынасу экстримінен бірнеше дүркін әлем рекордсмені:

- Бұл мен қатысып отырған бірінші акция емес. Осындай экологиялық шараларға тұрақты түрде қатысып тұруға тырысам. Қоршаған ортаны қорғау, балалардың бойында экологиялық мәдениетті қалыптасыру өте маңызды.

Жыл басынан бері Шортанды ауданында 6 мың түп көшет егілген. Алдағы уақытта тағы 300 түп ағаш егу жоспарланған. Егілген көшеттің бәрі жергілікті тұқымбақтарда өсіріледі.

Сағындық Шабаров, Шортанды ауданының әкімі:

- Біздің ауданымызда биыл міне 3 питомник ашылды. Үш питомниктен ағаштар бізге берілді. Сол көмектің арқасында биыл міне 6 мыңға жуық ағаш отырғыздық.

Бұдан бөлек экоакция аясында аудан жастар форумы өтті. Онда қоршаған ортаны қорғау, экологиялық мәдениетті қалыптастырудың жаңа әдіс-тәсілдерін енгізу жайы талқыланды.

Авторлары: Абзал Азаматұлы, Виктор Полянный