Ақмола облысында емделуші емханадан 1,6 млн теңге өндіріп алды

Ақмола облысының тұрғыны аудандық емхана дәрігерлері қауіпті асқынуды уақытылы анықтай алмаған соң өтемақы өндіріп алды. Соның салдарынан ер адам ұзақ уақыт бойы жұмыс істей алмаған, деп хабарлайды Tengri Health тілшісі Ақмола облыстық сотының баспасөз қызметі.

Шұғыл ауруханаға жатқызу және 1,5 литр ірің: не болды?

Сот мәліметінше, 2025 жылдың шілдесінде бір компанияда механизатор болып жұмыс істейтін Ақмола облысының Р. есімді тұрғыны бас ауруы, жөтел, мұрын бітелуі, дене қызуының көтерілуі және иығының сыздауына шағымданып, Целиноград аудандық емханасына жүгінген.

Бастапқыда дәрігерлер оған мынадай диагноздар қойған:

ЖРВИ, өткір назофарингит асқыну сатысындағы созылмалы бронхит, және полисегментарлы пневмония (өкпе тінінің бірнеше сегментін бірдей зақымдайтын қабыну).

Бірнеше күннен кейін ер адам емханаға қайта барған. Бұл жолы ол қолы мен иық буынының ауырғанына және ісінгеніне шағымданды.

Басқа дәрігер оған "ревматоидты артрит" диагнозын қойып, травматологқа баруды ұсынған.

Анықтама: Ревматоидты артрит - бұл иммундық жүйе буын тіндеріне зақым келтіретін созылмалы қабыну ауруы.

Травматолог С. иық буыны сіңірлерінің созылуы мен шамадан тыс күш түсуі деген диагноз қойған.

Алайда бір аптадан кейін ер адам Астанадағы ауруханалардың біріне шұғыл жатқызылды. Дәрігерлер оған сол жақ жоғарғы аяқ-қолының, жауырын үсті және асты аймақтарының флегмонасы диагнозын қойды.

Анықтама: Флегмона - бұл жұмсақ тіндердің жедел іріңді қабынуы, ол айналасындағы тіндерге тез таралуы мүмкін.

Пациентке шұғыл операция жасалып, шамамен 1,5 литр ірің сорып алынған.

Сарапшылар дәрігерлерден қандай қателік тапты?

Сарапшылар комиссиясының қорытындысына сәйкес, аудандық емхана дәрігерлері пациентті тексеру және емдеу кезінде қателіктерге жол берген.

"Сарапшылар диагноз уақтылы қойылмағанын, талдаулар мен зерттеулердің нәтижелері еленбегенін анықтады. Бұл гематоманың пайда болып, флегманың дамуына әкеліп, нәтижесінде хирургиялық араласуды қажет еткен және иық буынының қызметі бұзылған", - деп атап өтті Ақмола сотының баспасөз қызметі.

Сонымен қатар комиссия медицина қызметкерлерінің әрекеті мен пациенттің денсаулығына келтірілген зиян арасындағы себеп-салдарлық байланысты анықтады:

"Пациенттің шағымдарына тиісті көңіл бөлінбеген, анамнезі үстірт жиналған, қойылған диагноз толық болмаған", - деп көрсетті мамандар.

Сот мәліметін бойынша, қате қойылған диагноз бен дұрыс емес емнің салдарынан ер адам ұзақ уақыт бойы еңбекке жарамсыз болған.

Емханадан қанша өтемақы өндірілді?

Бұған дейін бірінші сатыдағы сот пациенттің талап арызын ішінара қанағаттандырған. Целиноград аудандық емханасынан оның пайдасына моральдық зиян өтемі ретінде 700 мың теңге өндірілді.

Бұл ретте бірінші сатыдағы сот айырылып қалған жалақыны өтеу және емделу шығындарын қайтару туралы талапты қанағаттандырудан бас тартқан.

Ақмола облыстық сотының алқасы бұл шешімді қайта қарап, емханадан тағы 914 мың теңге айырылып қалған табысты өндірді. Сот ер адам ұзақ уақыт бойы еңбекке жарамсыздық парағында болғанын ескерді. Жалпы сома шамамен 1,6 миллион теңге болды.

Пациентке дәрі-дәрмек шығындарын өтеуден бас тартылды, өйткені іс материалдарына сәйкес бұл шығындарды сақтандыру компаниясы өтейді.

Сот актілері заңды күшіне енді.

Google News арқылы жаңалықтарымызды қадағалаңыз

Жазылу

науқастар

Сот

Денсаулық