Ақмола облысында жолдардағы қауіпсіздік күшейтілді

Ақмола облысындағы жолдарда қауіпсіздік шарасы күшейтілді.

Полицейлер рейдке шығып, көлік қозғалысын реттеуге кірісті. Жүргізушілердің жай-күйі де басты назарда.  Соңғы кездері ұзақ жолда шаршап, көзі ілініп кететіндер көбейген.  Олармен ақпараттық-түсіндіру жұмысы жүргізілді. 

Астана-Көкшетау бағытындағы тас жолда көлік қозғалысы бір тынған емес. Әсіресе демалыс күндері автокөлік саны еселеп артады, дейді мамандар. Сондықтан бақылауды күшейту маңызды. Қарсы бағытқа шығып кететіндер бар.   Бір-бірін басып озамыз деп, апатқа ұшырайтындар азаймай тұр.  

Жасұлан Мұшаев, көлік жүргізуші:

- Мынадай үлкен машиналарға келеді алдынан келіп, кесіп өтеді. Сонда моментта гружонный келе жатқасын тоқтай алмайсың ғой. Артынан кіріп кетететіндей моменттер болады.

Бұл тас жолдың бойында 10 шақты бейнебақылау камерасы бар. Алайда жылдымдықты асыратын жүргізушілерді камера тоқтата алмай отыр. Көбінде қос қаланың арасында жолаушы тасымалдайтын такси жүргізушілері тәртіпке бағынбайды, дейді жауаптылар. Қазір алдын алу шарасы күшейтіліп, ақпараттық-түсіндіру жұмыстары жүріп жатыр.  

Ержан Қошқарбаев, облыстық ПД басқармасының бастығы:

- Жыл басынан бері заңсыз адам тасымалдайтын такси жүргізушілері кесірінен бірнеше жол апаты тіркелді. Салдарынан 13 адам ажал құшып, 21 адам ауыр жарақат алды. Өйткені дәл осы жүргізушілер көбінесе телефонға алаңдап, жылдамдықты асырады. Биыл осындай 1039 жүргізушіні ұстап, айыппұл салдық. 

Жалпы өңірде жыл басынан бері 800-ге жуық жол-көлік оқиғасы тіркелген. Жол апатының алдын алу үшін полицейлер жол белгілерін көбейтіп, қауіпті учаскелерге бақылауды күшейткен. 

Нұрдәулет Оралбай, патрульдік полиция батальонының инспекторы: 

- Біз жол апаты көп тіркелетін аймақтарда жолдарды жасанды түрде тарылтып, арнайы белгілер қойдық. Онда жүргізушілер бірден жылдамдықты азайтып, бірін-бірі басып озуға мүмкіндігі болмайды. Сондай-ақ, жүргізушілерді тоқтатып түсіндірме жұмыстарын да жүргізіп тұрамыз.

Қысқа қарай сақшылар қауіпсіздікті екі есеге күшейтеді. Себебі күн райы құбылып, көктайғақ пен боран басталады. Сондайда дабылды ескертулерді елемейтіндер көп. 

Абзал Азаматұлы, Виктор Полянный