АҚШ баждары нақты Қазақстанға қарсы бағытталмаған СІМ

Қазақстанның Сыртқы істер министрлігі АҚШ-тың қазақстандық тауарлардың бір бөлігіне 12,5 пайыз көлемінде қосымша баж салығын енгізу туралы шешіміне қатысты пікір білдірді. Ведомство өкілдері америкалық тараптың бұл шешімі арнайы Қазақстанға қарсы бағытталмағанын айтты, деп хабарлайды Tengrinews.kz тілшісі.

Сыртқы істер министрлігі Tengrinews.kz редакциясының ресми сауалына берген жауабында жаңа баждар 2026 жылдың ақпанынан бастап АҚШ-тың Сауда туралы заңының 122-бөлімі негізінде қолданылған 10 пайыздық уақытша әмбебап импорттық үстеме орнына енгізілгенін айтты.

Анықтама: АҚШ-тың 1974 жылғы Сауда туралы заңының 122-бөлімі (Section 122 of the Trade Act of 1974) - АҚШ президентіне елдің төлем балансын қорғау үшін 150 күнге дейінгі мерзімге 15 пайызға дейін баж салығын енгізуге құқық беретін америкалық заңнама нормасы. 150 күн өткен соң, импорттаушы елдердегі еңбек құқықтарының бұзылуын алға тартып, бұл жаһандық тарифтер көбінесе мерзімсіз шектеулерге ауыстырылады.

Қазақстан тарапы алдын ала хабардар етіліп, америкалық тараппен өткен консультацияларға қатысты. Осы жұмыс барысында Сауда және интеграция министрлігі Қазақстан заңнамасы мен мәжбүрлі еңбекке қарсы іс-қимыл саласында қабылданып жатқан шаралар туралы ақпарат ұсынды.

АҚШ Сауда өкілдігі (USTR) қорытындысына сәйкес, Қазақстан мәжбүрлі еңбекті пайдалану арқылы өндірілген тауарлар импортына жеке тыйым салынбаған экономикалар қатарына жатқызылды.

"Америкалық тараптың шешімі Қазақстанда үшінші елдерден тиісті өнімдер импортын бақылаудың қолданыстағы механизмдерін бағалаумен байланысты", – деп түсіндірді ведомство.

СІМ Қазақстан мәжбүрлі еңбекті жою бойынша халықаралық күш-жігерді дәйекті түрде қолдайтынын және Халықаралық еңбек ұйымы мен басқа да көпжақты механизмдер аясындағы өз міндеттемелерін орындайтынын атап өтті.

Сондай-ақ министрлік америкалық тараптың бұл шешімі Қазақстанға ғана қатысты емес екенін атап өтті.

ҚАЗІР ТАЛҚЫЛАНЫП ЖАТЫР

Испанияда танымал зиян әдетке тыйым салынуы мүмкін

Кеше 18:07 1

"USTR шешімі АҚШ тауар импортының 99,4 пайызы келетін 60 экономикаға таралатынын ескеру қажет. Осылайша, бұл шара Қазақстанға қатысты атаулы сипатқа ие емес және америкалық әкімшіліктің кең ауқымды сауда саясатының бір бөлігі", – деп хабарлады СІМ.

Еске салсақ, шілденің аяғында АҚШ бірқатар елдің тауарларына 12,5 пайыз көлемінде қосымша баж салығын енгізген болатын.

Кейін Сауда және интеграция министрлігі жаңа баж салығы Қазақстанның АҚШ-қа экспорттайтын барлық тауарына емес, жекелеген тауар санаттарына ғана қатысты екенін хабарлады.

Ведомство мәліметінше, Қазақстанның АҚШ-қа экспортының шамамен 95 пайызы қосымша баж салығы әсерінен тыс қалады.

Google News арқылы жаңалықтарымызды қадағалаңыз