АҚШ Германиядан 5000 әскери қызметкерін шығарады

The Financial Times мақаласына сілтеме жасаған Aikyn.kz ешкім ойламаған төтенше қабылданған шешімнің астарында не жатқанын талдайды.

Саяси шешім АҚШ президенті Дональд Трамп пен Германия канцлері Фридрих Мерц арасындағы Иранға қатысты әскери науқанға байланысты ашық келіспеушілік аясында қабылданды. Америкалық әскерді шығару алдағы 6-12 ай ішінде аяқталады деп күтілуде.

Германия – Еуропадағы АҚШ әскері ең көп орналасқан елдердің бірі. Қазір онда шамамен 36 400 америкалық әскери қызметкер бар. Жалпы Еуропада АҚШ-тың 80 мыңға жуық әскери контингенті орналасқан. Германия аумағында АҚШ Еуропалық және Африкалық қолбасшылықтарының штаб-пәтерлері (Штутгарт), сондай-ақ Рамштайн әуе базасы мен Ландштуль медициналық орталығы жұмыс істейді .

Даудың басты себебі – Иранмен қақтығысқа қатысты екі түрлі ұстаным болып отыр. Германия канцлері АҚШ-тың бұл соғысқа «нақты стратегиясыз» кіргенін айтып, Вашингтон Иран тарапынан «қорлық көріп отыр» деп мәлімдеген. Бұған жауап ретінде Трамп Германия канцлерін қатаң сынап, оны өз елінің ішкі мәселелерімен айналысуға кеңес берді. Трамптың айтуынша, Мерц «иммиграция, энергетика және басқа да мәселелер бойынша нашар жұмыс істеуде».

Бұл шешім тек әскери емес, саяси және экономикалық салдарға да ие. АҚШ Еуропалық одақтың автомобильдеріне салынатын баж салығын 25%-ға көтеруі мүмкін екенін ескертті. Сонымен қатар Вашингтон кейбір еуропалық одақтастарға қару жеткізуде ұзақ кідірістер болуы мүмкін екенін хабарлаған.

NATO бұл жағдайға байланысты АҚШ-пен «мәлімдеменің егжей-тегжейін нақтылап жатқанын» мәлімдеді. Альянс Еуропаның қорғанысқа көбірек инвестиция салып, ортақ қауіпсіздік үшін үлкен жауапкершілік алуы қажет екенін атап өткен.

Германия қорғаныс министрі Борис Писториус АҚШ әскерінің Еуропада болуы екі тараптың да мүддесіне сай екенін айтқан. Дегенмен ол америкалық қатысудың қысқаруы «болжамды жағдай» екенін мойындап, Еуропаның өз қауіпсіздігін күшейтуі керектігін атап өтті. Осылайша, бұл шешім NATO ішіндегі жауапкершілік бөлінісі туралы бұрыннан келе жатқан мәселені қайта күн тәртібіне шығарды.