Тоқаевтың сынынан кейін Самұрық Қазына 650 қызметкерін жұмыстан шығарады

АСТАНА, 27 ақпан - Sputnik. "Самұрық-Қазына" қоры президенттің сынынан кейін Астанадағы кеңсе қызметкерлерінің санын 10%-ке қысқартады.

Бұл туралы қор басшысы Нұрлан Жақыпов мәлімдеді. Қорда барлығы 6,5 мыңға жуық адам жұмыс істейді, яғни 650-ге жуық қызметкер өз лауазымынан босатылады.

"Әкімшілік-басқару персоналдары қысқарады. Өндірістік персоналға бұл қысқарту әсер етпейді", - деді Жақыпов.

Бұған дейін Тоқаев"Самұрық-Қазына" қоры компанияларының құрылымын қайта қарау қажет екенін айтып, сынға алған болатын. Президенттің айтуынша, қорда басқарушы кадрлар шамадан тыс көп. Жоғары аудиторлық палата тарапынан да компанияға қатысты бірқатар шағым айтылды. Былтырғы жылдың соңында Жоғарғы аудиторлық палата "Самұрық-Қазына" қорының 236,5 миллион долларды тиімсіз пайдаланғанын анықтады. Жалпы аудит қорытындысы бойынша қорда 680,6 мың долларға қаржылық заң бұзушылық анықталды.