АҚШ ХҚС президенті мен прокурорына қарсы санкциялар енгізді

АҚШ үкіметі Гаагадағы Халықаралық қылмыстық соттың президенті мен аға прокурорына қарсы санкциялар енгізді. ХҚС Вашингтонның бұл әрекеттері "құқық үстемдігіне нұқсан келтіреді" деп мәлімдеді, деп хабарлайды Tengrinews.kz тілшісі DW басылымына сілтеме жасап.

АҚШ үкіметі Халықаралық қылмыстық соттың (ХҚС) президенті Томоко Аканэ мен аға прокуроры Абдулай Сейеге қарсы санкциялар жариялады. Бұған олардың сот юрисдикциясын мойындамайтын елдердің лауазымды тұлғаларына қатысты істерге қатысуы себеп болған.

"Бұл тұлғалар ХҚС юрисдикциясын мойындамайтын мемлекеттердің лауазымды тұлғаларын тергеу, қамауға алу, ұстау немесе сот арқылы қудалау бойынша ХҚС күш-жігеріне тікелей қатысты", - деп мәлімдеді АҚШ мемлекеттік хатшысы Марко Рубио.

Ол Халықаралық қылмыстық сотты "жемқорлық жайлаған және саясиланған, өкілеттігін қасақана асыра пайдаланып, өз мандатының шегінен шығатын ұлттан жоғары тұратын сот" деп атады.

Гаагада бұған Вашингтонның шаралары "құқық үстемдігіне нұқсан келтіреді" деп жауап берді.

"Сот қайраткерлеріне заңды қолданғаны үшін қауіп төнгенде, халықаралық құқықтық тәртіптің өзіне қауіп төнеді", - делінген соттың журналистерге жолдаған мәлімдемесінде.

ХҚС өз ұстанымының "айнымас" екенін және "өз қызметкерлері мен ақылға сыймайтын айуандықтардың құрбандарын табанды түрде қолдайтынын" атап өтті.

Рим статутына мүше емес АҚШ бұған дейін де ХҚС өкілдеріне қарсы шектеулер енгізген болатын. Санкциялар Штаттарға кіруге тыйым салуды және америкалық қаржы жүйесі арқылы операциялар жүргізуді қарастырады.

13 шілдеде Вашингтон ХҚС-қа қарсы ауқымды науқан басталғанын жариялап, соттың іс-әрекетін "АҚШ егемендігіне қабылданбайтын қауіп" деп атады. Мемлекеттік департаменттің мәліметінше, ХҚС америкалық әскери қызметшілер мен барлау қызметкерлеріне қатысты тергеу бастаған және бұл істерді жабудан бас тартып, "есеп бермейтін жаһандық төреші болуға ұмтылып жатыр".

Бұған дейін Халықаралық қылмыстық сотқа мүше елдер көпшілік дауыспен бас прокурор Кәрім Ханды қызметінен босатқан болатын. Бұл сот тарихындағы алғашқы оқиға болды. Шешім жыныстық қудалау айыптары бойынша тергеуден кейін қабылданды.

Google News арқылы жаңалықтарымызды қадағалаңыз