АҚШ Иранға жаңа қуатты соққылар сериясын бере бастады

Бейсенбіге қараған түні АҚШ Иранға қарсы әуе соққыларының жаңа сериясын бастады. Бұл туралы Axios журналисі Барак Равид жоғары лауазымды америкалық шенеунікке сілтеме жасап хабарлады, деп жазады Tengrinews.kz.

"Маған АҚШ билігінің өкілі америкалық әскерилер Иранға әуеден соққы жасап жатыр деп хабарлады", - деп жазды Равид X әлеуметтік желісіндегі хабарламасында.

Кейінірек АҚШ Орталық қолбасшылығы (CENTCOM) америкалық күштердің Иранға соққы жасауды шығыс уақытымен сағат 20:00-де (Астана уақытымен 05:00) бастағанын жариялады.

"Бұл соққылар Иранның Таяу Шығыста орналасқан АҚШ күштеріне жасауға тырысқан шабуылдарына қайтарылған қатаң жауап", - делінген хабарламада.

28 шілде күні кешке Иранның Ислам революциясы сақшылар корпусының (ИРСК) күштері Иорданиядағы Америка әуе базасына бірнеше баллистикалық зымыран ұшырды. CENTCOM мәліметінше, Иранның барлық зымырандары атып түсірілген.

Кенеттен жасалған шабуылға жауап ретінде АҚШ президенті Дональд Трамп Иранға жойқын соққы жасап, олардың "сазайын тартқызуға" уәде берді.

Вашингтон соңғы рет Иранға жасалған соққылар толқыны туралы ресми түрде 23 шілдеде жариялаған болатын. Axios мәліметінше, 24 шілдеде Трамп жаңа соққылар жасамау туралы бұйрық берген.

Сол кезде Америка лидері журналистерге соққыларды жалғастыру немесе "олардың барлық мүмкіндігін жою" үшін шабуылды күшейту нұсқасы бар екенін айтқан болатын. Солай десе де, ол Тегеранмен келісімге келуді "неғұрлым ақылды стратегия" деп санайтынын аңғартты.

АҚШ тарапынан кідіріс болғандықтан, Иран армиясы да аймақтағы Американың әскери нысандарына жауап ретіндегі соққыларды тоқтатқанын мәлімдеді.

27 шілдеде Иран СІМ ресми өкілі Исмаил Багаи Тегеран мен Вашингтон делдалдар арқылы келіссөздер жүргізуді жалғастырып жатқанын хабарлады. Келесі күні Иран СІМ америкалық тараптың шектен тыс талаптарына байланысты Иранның АҚШ ұсынысынан бас тартқанын мәлімдеді.

Google News арқылы жаңалықтарымызды қадағалаңыз