АҚШ бітімгершілік аясында Иранға жаңа соққылар жасады

АҚШ Қарулы күштері Орталық қолбасшылығының өкілі Тим Хокинс АҚШ-тың Ормуз бұғазы маңындағы Иран нысандарына шабуыл жасағанын мәлімдеді, деп хабарлайды Tengrinews.kz тілшісі NBC News-ке сілтеме жасап.

АҚШ Қарулы күштері Орталық қолбасшылығының өкілі Тим Хокинс АҚШ-тың Ормуз бұғазы маңындағы Иран нысандарына шабуыл жасағанын мәлімдеді, деп хабарлайды Tengrinews.kz тілшісі NBC News-ке сілтеме жасап.

Ол соққылардың "қорғаныс" сипатында болғанын және олардың "зымыран ұшыру қондырғылары мен мина орнатпақ болған ирандық катерлерге" бағытталғанын нақтылады.

Оның айтуынша, соққылар Иранның оңтүстігіндегі Ормуз бұғазына жақын орналасқан Бендер-Аббас ауданына жасалған. Бұл ретте, телеарна мәліметінше, 8 сәуірде күшіне енген АҚШ пен Иран арасындағы уақытша атысты тоқтату режиміне қатысты қандай да бір өзгерістер туралы хабарланған жоқ.

"АҚШ Қарулы күштерінің Орталық қолбасшылығы атысты тоқтату режимі жағдайында ұстамдылық таныта отырып, біздің күштерді қорғауды жалғастырады", - деп атап өтті Хокинс.

Сонымен қатар Иран БАҚ-тары Бендер-Аббаста және бұғаз маңындағы жағалау аудандарында жарылыстар болғанын хабарлады. Reuters агенттігі сілтеме жасаған Mehr агенттігі қаладағы жағдай бақылауда екенін және алаңдауға негіз жоқ екенін жазды.

Еске сала кетейік, бұған дейін АҚШ президенті Дональд Трамп Иранның байытылған уранына қатысты мәлімдеме жасаған болатын. Америкалық көшбасшы тиісті жазбаны Truth Social әлеуметтік желісінде жариялады.

Оның айтуынша, Иранның байытылған ураны әкету және жою үшін дереу Америка Құрама Штаттарына берілуі тиіс, не болмаса, дұрысы - Тегеранмен бірлесіп және келісе отырып, сол жерде немесе басқа қолайлы орында жойылуы керек. Сонымен қатар америкалық көшбасшы бұл процеске куәгер ретінде "Атом энергиясы жөніндегі комиссия немесе оның баламасы" қатысатынын атап өтті.

Ақ үйдің жоғары лауазымды өкілі NBC News арнасына бұл президенттің жаңа ұстанымы емес екенін және оның бұған дейін Иран тарапына жеткізілмеген қандай да бір талаптарды білдірмейтінін хабарлады.