АҚШ Иранмен соғыста алыс қашықтыққа ұшатын зымырандар қорын дерлік тауысты БАҚ

АҚШ Иранмен арадағы соғыс барысында жерде орналасатын алыс қашықтықтағы зымыран қорларын айтарлықтай тауысты. Мұндай зымырандардың аздығы АҚШ армиясының болашақтағы ықтимал қарулы қақтығыстарға дайындығына қатысты қауіп туғызып отыр. Бұл туралы сейсенбі, 4 тамызда Reuters агенттігі АҚШ әкімшілігіндегі дереккөздерге сілтеме жасап хабарлайды, деп жазады Tengrinews.kz.

Мақалада сөз негізінен ATACMS алыс қашықтықтағы баллистикалық зымырандары мен PrSM (Precision Strike Missile) жоғары дәлдіктегі жедел-тактикалық зымырандары туралы болып жатқаны айтылған.

Агенттік екі дереккөзінің хабарлауынша, АҚШ құрлық әскерлерінің қару-жарағындағы "жер-жер" класындағы зымырандардың "барлығын дерлік" жұмсап қойған. Бұл ретте сұхбат берушілер нақты сандарды атаудан бас тартты.

Сарапшылардың пікірінше, әрқайсысының құны миллион доллардан асатын мұндай зымырандар Қытаймен немесе Ресеймен қақтығыс болған жағдайда да шешуші рөл атқаруы мүмкін еді.

Сонымен қатар Ирандағы соғыс басталғалы бері америкалықтар бүкіл әлемдегі әскери базаларында сақталатын және АҚШ Әскери-теңіз күштерінің кемелері мен сүңгуір қайықтарынан ұшырылатын Tomahawk қанатты зымырандары қорының жартысына жуығын тауысқан. Бұл туралы Reuters агенттігіне тағы бір есімін жарияламаған дереккөз мәлімдеді.

Patriot әуе шабуылына қарсы қорғаныс кешендеріне арналған зымыран-тосқауылдар мен THAAD зымыранға қарсы қорғаныс жүйелері сияқты қорғаныс қару-жарақтарының қоры да айтарлықтай азайған.

Агенттік Стратегиялық және халықаралық зерттеулер орталығының деректерін келтіреді, оған сәйкес 2026 жылдың ақпаны мен шілдесі аралығында АҚШ Patriot зымыран-тосқауылдарының шамамен 65 пайызын жұмсаған, ал THAAD қорлары кем дегенде 38 пайызға азайған. Reuters-тің екі сұхбат берушісі бұл деректердің АҚШ әкімшілігінің ішкі ақпаратына сәйкес келетінін растады.

Сонымен қатар АҚШ президенті Дональд Трамп негізгі қару-жарақ қорларының азаюына байланысты алаңдаушылықты жоққа шығарған. АҚШ-та "әлемдегі кез келген елге қарағанда оқ-дәрі қоры әлдеқайда көп" және олардың саны "біздің қажеттіліктерімізден едәуір асып түседі" делінген Ақ үйдің мәлімдемесінде.

Google News арқылы жаңалықтарымызды қадағалаңыз