АҚШ Киевке HAWK зениттік зымыран кешеніне арналған жабдықты сатады

АСТАНА, 22 мамыр – Sputnik. АҚШ Мемлекеттік департаменті Украинаға HAWK зениттік-зымыран кешенінің жұмыс қабілетін қолдауға арналған жабдықты 108,1 миллион долларға сату мүмкіндігін мақұлдады.

Сондай-ақ Мемдепартамент сайтындағы хабарламада Украина үкіметінің төмендегілерді сұратқаны айтылған:

діңгекті тіркемелерді сатып алу;

ірі модификациялар;

техникалық қызмет көрсетуге қолдау көрсету;

қосалқы бөлшектер;

шығын материалдары мен аксессуарлар;

жөндеу жұмыстарына көмек;

АҚШ үкіметінің инженерлік, техникалық және логистикалық қызметтерінің қолдауы.

Сондай-ақ FrankenSAM HAWK зымыран жүйелеріне арналған логистикалық және бағдарламалық қолдаудың өзге де элементтері қамтылған.

"Бұл Украинаға қазіргі және болашақ қауіптерге қарсы тұруға, сондай-ақ өзін-өзі қорғауға және өңірлік қауіпсіздік миссияларын орындауға мүмкіндік береді", – деп хабарлады АҚШ Мемлекеттік департаменті.

Ведомствоның мәліметінше, Украина бұл тауарлар мен қызметтерді өз Қарулы күштерінің құрамына еш қиындықсыз қабылдай алады. Бұл жабдықты сату өңірдегі негізгі әскери тепе-теңдікті өзгертпейді.