АҚШ Конгресіне бытырамен оқталған мылтық алып жүгірген адам ұсталды

Ассошиэйтед Пресс хабарламасына сүйенген Aikyn.kz Конгресс маңында болған оқиғаның жай-жапсарын түсіндіреді.

Капитолий полициясының басшысы Майкл Салливанның айтуынша, күдіктінің аты Картер Камачо (Джорджия штаты). Ол жол талғамайтын Mercedes көлігін Капитолий маңына қойып, оқталған мылтықпен «бірнеше жүз метр» ғимаратқа қарай жүгірген. Осы сәтте полиция қызметкерлері оны тоқтатып, қаруын жерге тастауға және жерге жатуға бұйрық берген.

Баспасөз мәслихатында Салливан ұсталған күдікті Камачоның тактикалық кеудеше мен қолғап кигенін, ал көлігінің ішінде кевларлы дулыға және газтұмылдырық болғанын айтқан. Оның сөзінше, бытыра мылтық оқталған, әрі қосымша оқ-дәрі де болған.

Салливан оқиғаның себебі тексеріліп жатқанын, оның ішінде нысана Конгресс мүшелері болуы мүмкін-болмағаны анықталатынын мәлімдеді. Полицияда бейнежазбалар бар екенін айтқан Салливан, бірақ оқиғаны түсіріп алған кездейсоқ куәгерлерден видеоматериал болса беруді сұраған.

«Егер біздің офицерлер дәл осы жерде болмаса, не боларын кім білсін?», – дейді ол. Салливан соңғы айларда департамент дәл осы аумақта мектептегі атыс жағдайына ұқсас сценарийлер бойынша оқу-жаттығу өткізгенін де хабарлаған.

Салливанның айтуынша, Камачо бұған дейін құқық қорғау органдарына назарына ілікпеген адам ретінде сипатталды. Полиция басшысы көлік күдіктінің атына тіркелмегенін, оның бірнеше мекенжайы бар екенін айтқан. Капитолий полициясының баспасөз хабарламасына сәйкес, ол заңсыз әрекет, қаруды лицензиясыз алып жүру, тіркелмеген атыс қаруы және тіркелмеген оқ-дәрі бойынша ұсталған.

Соңғы жылдары Капитолий аумағында түрлі оқиғалар тіркелген. Соның ішінде 2023 жылы Сенатқа жақын саябақта мылтық ұстаған Атланта тұрғыны да ұсталған. Бұл оқиға президент Дональд Трамптың Конгреске жыл сайынғы «Одақ жағдайы туралы жолдауына» бір апта қалғанда болған. Салливан соңғы жағдай ведомство жоспарларын өзгертпейтінін айтады: «Біз Одақ жағдайы туралы жолдауға өте байыппен қараймыз».

Вашингтондағы қылмыс деңгейі 2026 жылы 2025 жылмен салыстырғанда айтарлықтай төмендеген. Ал 2025 жылы да алдыңғы жылмен салыстырғанда айтарлықтай азайған.

Өткен жылдың тамызында Трамп қылмысқа қарсы күрес үшін қалада төтенше жағдай жариялап, 2 000-нан аса Ұлттық гвардия әскері мен мыңдаған федералдық құқық қорғау қызметкері мен агентін орналастырған. Полиция қызметкерлері мен агенттер қалада әлі де көптеп жүр. Өткен аптада Вашингтонда АҚШ маршалдары қызметімен қақтығыс кезінде қала тұрғыны қаза тапты. Қала белсенділері бұл оқиғаға қатысты тергеудің ашық болуын талап еткен. Бұл істі де қалалық полиция тергеуде.