АҚШ Ресейдің ірі мұнай компанияларына санкция енгізді

Вашингтон Ресейдің «Роснефть» пен «Лукойл» компанияларына қарсы санкциялар жариялап, Мәскеуді Украинадағы соғысты тоқтатуға ниетсіз деп айыптады. Бұл туралы Reuters агенттігі хабарлады. Шектеулер туралы мәлімдемеден кейін мұнай бағасы барреліне 2 доллардан астам қымбаттады.

АҚШ Қаржы министрлігі Ресейдің екі жетекші мұнай алыбына қарсы жаңа шектеу шараларын енгізгенін растады. Ведомствоның хабарлауынша, бұл шешімнің негізгі мақсаты — Мәскеудің соғыс қаржысын қысқарту.

Санкция Ресейдің ядролық жаттығулары өткен соң жарияланды. Сарапшылар мұны Ақ үйдің Мәскеуге қатысты ұстанымының қатаң бағытқа ауысқанының айғағы деп бағалайды. Бұған дейін Дональд Трамп әкімшілігі Ресейге байланысты салыстырмалы түрде жұмсақ саясат ұстанған еді.

Сонымен қатар Еуропалық одақ Ресейге қарсы 19-пакет санкцияны бекітіп, ресейлік сұйытылған газ импортына тыйым салды. Бұл шешім де мұнай нарығына әсер етіп, Brent маркалы мұнай бағасын барреліне 2 доллардан жоғары көтерді.

Дональд Трамптың айтуынша, жаңа санкциялар ресей халқын емес, соғысты жалғастырып отырған билікті нысанаға алған. Сондай-ақ ол алдағы аптада Оңтүстік Кореяда өтетін кездесуде Қытай төрағасы Си Цзиньпиннің Ресей президенті Владимир Путинге ықпал етуін қалайтынын жеткізді.

Бүгін, 10:43