АҚШ Ресейге жаңа санкциялар дайындап жатыр

Бұл туралы Bloomberg басылымы мәлімдеді. Санкция Ресей Украинамен соғысты тоқтатуға арналған бейбітшілік келісімінен бас тартқан жағдайда енгізіледі. Ол ресейлік энергетикалық секторға қатысты болмақ. 

Құрама Штаттар мұнай тасымалдауға көмектескен трейдерлерге және «көлеңкелі флот» кемелеріне шектеу қоймақ. Нақты қандай шаралар қабылданатыны осы аптада белгілі болуы мүмкін. АҚШ-тың қаржы министрі Скотт Бессент бұл жоспарды еуропалық елшілермен кездесу барысында талқылағанын айтты. Алайда шешімді президент Дональд Трамп қабылдайды. Ресейлік тарап жаңа санкциялар жөнінде әзірге естімегенін жеткізді. Айта кету керек, Америка мен Украина арасындағы келіссөз бойынша оң нәтиже байқалады. Дегенмен территориалды және қауіпсіздік кепілдіктеріне қатысты әлі де шешілмей жатқан сұрақтар бар.