АҚШ та алғаш рет мерекелік сауда көлемі $1 трлн жеткелі тұр

АҚШ-тағы жаңа жылдық мерекелік бөлшек сауда көлемі биыл алғаш рет 1 трлн долларға  жеткелі тұр.

Аталған салаға жауапты америкалық федерацияның болжамы осындай. Хан-ука, Католиктер рождествосы мен, Жаңа жыл арасындағы мерекелік маусым, бүкіл желтоқсан бойы сатушылардың саудасын қыздырып, жәрмеңкелердің жүктемесін арттырып отыр. Әсіресе қолөнер бұйымдары  мен, тағам өнер-кәсібіне сұраныс жоғары.

Дәл осы тот басқан темір саймандарға ұқсайтын шоколадтар мына мен тұрған Вашингтондағы мерекелік жәрмеңкенің негізгі тауарларының біріне айналған. Біз де дәмін татып, байқап көрейік. Мына балғаны жеп көрейін мен. Дәмі кәдімгі шоколад. Еш айырмашылығы жоқ. Германиядан арнайы әкелген осы шоколадтарды 3D принтерден басып шығарған екен. Осы секілді тәтті дәмділер, көздің жауын алатын безендірулер Вашингтондағы жаңа жылдық және рождестволық жәрмеңкенің сәніне айналды.

Даунтаун Диси сайтының мәліметінше, дәл осы қаланың қақ ортасындағы мерекелік аймаққа күніне 10 мыңнан аса адам келеді. Демалыс күндері бұл көрсеткіш бірнеше есе өседі. Мұндай қарқын қала бюджетімен қоса, шағын және орта бизнес өкілдеріне де оңтайлы мүмкіндік болып отыр.

Эми Сисел, сатушы:

- Биылғы саудамыз жақсы жүріп жатыр. Адамдардың қарасы қалың. Әсіресе құстардың әйнек мүсініне сұраныс жоғары. Тіпті санынан жаңылдық. Біз осында келгелі бері ауа райы да жақсы болып тұр.

Серэй, сатушы:

- Біз грузиялық шебердің әшекей-бұйымдарын АҚШ-қа әкеліп сатып жатырмыз. Биыл алқалар мен жүзіктерге сұраныс артқанын байқадық. Мереке кезінде және демалыс күндері жәрмеңкеде ине шаншар орын болмайды. Тіпті бізден былтыр әшекей алып кеткен кісілер, биыл тағы іздеп келіп, сауда жасап жатыр.

АҚШ-тың Ұлттық бөлшек сауда федерациясының болжамынша, 2025 жылдың соңындағы мерекелік сатылымдар көлемі мемлекет бойынша 1 трлн-ға жетуі мүмкін. Бұл былтырғы көрсеткіштен 4 пайыз артық. Ал оның дені дәл осындай жәрмеңкелерде сатылады.

Яна, студент:

- Осы мереке қарсаңында сыныптасымды көру үшін Нью-Йорктан арнайы келдім. Құр жүрмей, денсаулыққа пайдалы өсімдіктердің қоспасы бар шай сатып алдым.

Пэң, турист:

- Бұл біздің Вашингтондағы алғашқы мерекелік жәрмеңкеміз. Қала бойынша қызықты шаралар ұйымдастырылып жатқанын көрдік. Солардың бәрін иттерімізбен бірге аралап, тамашалап жүрміз.

Ерекше орындардың бірі АҚШ Конгресінің ғимараты. Биыл Капитолий алдындағы «Халық шыршасы» алғаш рет Невада штатынан әкелінді. Гумбольд-Тоябе саябағында жайқалып өскен мерекелік ағашқа «Күміс ару» деген ат қойылды. Әшекейлер ретінде  әдеттегідей Невадада тіршілік ететін аң-құстың бейнелері ілінді. Осылайша, 61 жылдық тарихы бар дәстүр тағы да өз жалғасын тапты.

Авторлары: Ердана Ержанұлы, Эндрю Фанг