АҚШ та шатдаун салдарынан әуе рейстері тоқтатылып, кешіктірілуде

АҚШ-та республикалықтар мен демократтар федералдық бюджет бойынша ортақ шешімге келе алмай отыр. Сондықтан қазіргі шатдаун тарихтағы ең ұзаққа созылған оқиға болуы мүмкін, деп хабарлайды Евронью́с.

Шатдаун салдарынан ел әуежайларында рейстер кешігіп, кейбірі мүлдем тоқтатылып жатыр. Федералдық авиация басқармасы (FAA) әуе қозғалысын мәжбүрлі түрде баяулатты.

Үкіметтің жұмысы тоқтағандықтан, шамамен 13 мың авиадиспетчер жалақысыз жұмыс істеуге мәжбүр. Алайда олардың бәрі жұмысқа шығып жатқан жоқ — көпшілігі аурухана парағын рәсімдеуде. Соның салдарынан әуе қозғалысын кестеге сай ұйымдастыру барған сайын қиынға түсіп жатыр.

FAA Даллас пен Остин әуежайларында диспетчерлердің жетіспеуі салдарынан рейстер кешіккенін хабарлады. Дүйсенбі күні шамамен 2900 рейс кешіктірілді. Хьюстон мен Вашингтон әуежайларында да жаңа кешігулер болуы мүмкін.

Көлік министрі Шон Даффи жағдайдың одан әрі нашарлауы ықтимал екенін ескертті. Оның айтуынша, FAA қызметкерлерінің тапшылығы шатдаунға дейін де рейстердің кешігуіне себеп болған.

«Ұлттық әуе кеңістігіндегі кез келген ұшуды адамдардың қауіпсіздігін қамтамасыз ету үшін аялдатуға немесе тоқтатуға дайынбыз», — деді ол ABC News арнасына берген сұхбатында. — «Егер үкімет келесі бір-екі апта ішінде жұмысын қайта бастамаса, бүгінгі күндерді жақсы уақыт ретінде еске алатын боламыз».

Авиадиспетчерлер — мемлекеттік маңызды қызметкерлер, сондықтан шатдаун кезінде де жалақысыз жұмыс істеуге міндетті.

Үкімет жұмысы 1 қазан күні тоқтады. Бұл жағдай денсаулық сақтау саясатына қатысты саяси пікірталастардан туған — нақтырақ айтқанда, медициналық сақтандыру сатып алуға мемлекеттік субсидия беретін Қолжетімді денсаулық сақтау туралы заңды (Obamacare) қаржыландыру мәселесіне байланысты.

Демократ сенаторлар медициналық сақтандыру бойынша салықтық жеңілдіктерді ұзартуды талап етіп, позициясынан қайтар емес. Республикалықтар болса, бұл мәселені кейінірек қарастыруға болады деп санайды.

Бүгін, 13:41