АҚШ та төтенше жағдай жарияланды. LIVE

АҚШ-тың оңтүстік, орталық және солтүстік-шығыс аймақтарында жаңбыр аралас қар жауып, боран соғып, аяз күшейді.

Бір миллионнан астам үй жарықсыз отыр. Боран кезінде 17 адам көз жұмған. Қолайсыз ауа райынан елде 19 мыңнан аса әуе рейсі тоқтатылды. Халық әбігерге түсіп жатыр.

Ердана Ержанұлы, тілші:

- Өткен апта метеорологтар Вашингтонда боран соғып, аяз тұрады деп ескерте салысымен адамдар дүкендерге ағылып, азық-түлікті көптеп сатып ала бастады. Супермаркет сөрелері лезде босап қалды. Жұрт негізінен су, тез дайындалатын тамақ, жұмыртқа, ет, отын, генератор секілді өнімдерді алған. АҚШ астанасында алдымен қар жапалақтап жауып, кейін жаңбыр себелеп, жолдарды көктайғақ етті. Соңғы екі күнде қардың қалыңдығы 25 cантиметрге жеткен. Осының салдарынан Вашингтонның коммуналдық қызметтері шаһар көшелерін қардан ашып үлгірмей жатыр. Қолайсыз ауа райына байланысты Колумбия округімен бірге 24 штатта төтенше жағдай жарияланды. Президент Дональд Трамптың өзі қарлы боран көп аймақта тұрғанын айта келе азаматтарды абай болуға шақырды. Әр штат губернаторлары да ахуалға байланысты аса қажеттілік болмаса жолға шықпауға кеңес беріп жатыр. Содан болса керек кешелі бері жолда көлік аз. Мына мен тұрған жолайырықтан әдетте көлік үзілмейтін. Қазір бірер-сараң болмаса жолдар қаңырап бос қалған десе болады. Қарлы боран жалпы 200 млн американдықтың соңғы үш күндегі жоспарын өзгертті. Оның ішінде Кентукки, Теннеси, Миссисипи, Луизиана штаттарындағы 1 млн шаңырақ жарықсыз қалды. Оған жаңбыр араласқан қардың электр сымдарын зақымдауы себеп.  Қайта қалпына келтіру жұмыстары баяу жүріп жатыр. Жергілікті полиция өкілдері аяздан 17 адамның көз жұмғанын хабарлады. Сондай ақ Мэйн штатындағы Бангор әуежайында 8 адамдық шағын ұшақтың апатқа ұшырағаны мәлім болды. Әзірге жапа шеккендер жайлы ақпарат жарияланбады. Төтенше жағдай жарияланған аймақтарда мектептер мен өзге де білім ордалары қашықтан оқуға ауыстырылып, кейбірі уақытша жабылған.