АҚШ та Жерден тыс болашақ соғыстарға дайындалуға шақырды

Біріккен штаб бастықтары комитетінің төрағасы генерал Дэн Кейннің айтуынша, Америка әскері тек жер маңындағы орбитада ғана емес, Ай төңірегінде де соғыс қимылдарына дайын болуы тиіс, деп хабарлайды Tengrinews.kz тілшісі The Washington Times басылымына сілтеме жасап.

АҚШ президенті Дональд Трамптың бас әскери кеңесшісі бұл туралы сәрсенбі күні өткен авиация, ғарыш және киберқауіпсіздік жөніндегі конференцияда мәлімдеді.

"Достар, біздің міндетіміз - теңіз түбінен бастап Ай маңындағы кеңістікке дейінгі жаһандық бәсекелестік жағдайында біріккен күштердің соғысуға, төтеп беруге және жеңіске жетуге дайын болуы үшін дәл қазір бейімделу", - деді генерал Кейн Жерден Ай орбитасына дейінгі ғарыш аймағын меңзеп.

Бұл мәлімдеме АҚШ ресми тұлғаларының орбитада әскери қарудың бар екенін алғаш рет растағанынан екі күн өткеннен кейін жасалды.

Washington Post басылымының мәліметінше, бұл қару-жарақ АҚШ-қа қарсылас спутниктері Америка әскеріне немесе аппараттарына қарсы қолданылған жағдайда олардың көзін жоюға мүмкіндік береді.

Associated Press агенттігі АҚШ-тың Ғарыш күштері Жер атмосферасынан тыс жерде және Ай маңындағы кеңістікте болуы мүмкін қақтығыстарға дайындалып жатқанын хабарлайды.

"Қытай секілді әлеуетті қарсыластарымыз осы жүйеде, ғарыштың кейбір бөліктерінде белсенді жұмыс істеп жатыр. Елді қорғауға дайындалып жатқандықтан, қарулы күштерімізде тиісті мүмкіндіктер бар. Бұл мүмкіндіктердің болуының басты себебі - тежеу факторларын күшейту", - деді Ғарыш күштерінің жауынгерлік іс-қимылдар қолбасшысы генерал-лейтенант Грегори Ганьон.

Ол Вашингтон бес жыл ішінде Ғарыш күштерінің санын екі есеге арттырып, шамамен 25 мың әскери қызметшіге жеткізу жоспары бар екенін мәлімдеді.

Бізді Google-дың негізгі дереккөздер тізіміне қосыңыз