Ким Чен Ын шиеленістің күшеюі аясында армияны соғысқа дайындалуға шақырды

Солтүстік Корея көшбасшысы Ким Чен Ын бөлімшелердің соғысқа толық дайындығын қамтамасыз ету үшін жауынгерлік іс-қимылдарға дайындықты аяқтауға шақырды және әскери дайындықты түбегейлі жетілдіру қажеттігін атап өтті, деп хабарлайды Tengrinews.kz "Анадолу" агенттігіне сілтеме жасап.

Басылым мәліметінше, Кореяның орталық телеграф агенттігі (КОТА) Ким Чен Ынның Корей халық армиясы (КХА) рота командирлерінің үшінші съезі аясында ұйымдастырылған іс-шарада сөз сөйлегенін хабарлады.

Оның айтуынша, рота командирлерінің басты міндеті - өз бөлімшелерінің соғысқа толық дайындығын қамтамасыз ету үшін жауынгерлік әзірлікті аяқтау. Сонымен қатар ол бұған оқу-жаттығу және жауынгерлік дайындық жұмыстарын түбегейлі жақсарту арқылы қол жеткізуге болатынын атап өтті.

Солтүстік Корея көшбасшысы рота командирлері қарулы күштердің негізін одан әрі нығайта түсетінін мәлімдеп, солардың арқасында армияның болашағы өте зор екенін айтты.

Соңғы уақытта Солтүстік және Оңтүстік Корея арасындағы шиеленіс 21 қыркүйекте демилитаризацияланған аймақта болған оқиғадан кейін қайта күшейді. Ол жерде жаяу әскерге қарсы минаның жарылуы салдарынан оңтүстіккореялық үш әскери қызметші зардап шеккен болатын. Сеул болған оқиғаға Пхеньянды айыптады. Солтүстік Корея жарылыс үшін жауапкершіліктен бас тартып, егер оның әскерилеріне оқ атылса, жауап "дереу және аяусыз" болатынын мәлімдеді.

КХДР көшбасшысының қарындасы әрі билеуші Корея еңбек партиясының жалпы істер департаментінің басшысы Ким Ё Чжон 19 қазанда жасаған мәлімдемесінде оңтүстік шекарада "оңтүстіккореялық әскери қарақшылардың" кесірінен "күрделі" тұрақсыз жағдай қалыптасқанын алға тартты. Ол Сеулді арандатушылық жасады деп айыптады.

Оның айтуынша, Пхеньян оңтүстік шекарада орналасқан тактикалық соққы жасау құралдарының санын арттыруды, сондай-ақ өткен жылы тоқтатылған дауыс зорайтқыштар арқылы насихаттық хабарларды таратуды қайта бастау мүмкіндігін қарастырып жатыр. Өз кезегінде Оңтүстік Кореяның Штаб бастықтары біріккен комитетінің төрағасы Чин Ён Сон алдыңғы шептегі бөлімшеге барған кезде әскери қызметшілерге Солтүстік тарапынан жаңа арандатушылықтар болған жағдайда батыл тойтарыс беруді бұйырды.

Бізді Google-дың негізгі дереккөздер тізіміне қосыңыз