Қазақстанда қайта қамауға алу: Конституциялық Соттың шешімі қандай

Қазақстанның Конституциялық Сотында адамды бір күдік бойынша қандай жағдайда қайтадан тергеу изоляторына қамауға болатыны, ал қай кезде күштік құрылымдардың әрекеті заңсыз деп танылатыны түсіндірілді.

Мәселені қарауға бір іс бойынша бұрынғы қамауда ұстау мерзімі аяқталғаннан кейін қайта ұсталған Қазақстан азаматының өтініші себеп болған. Бұған дейін сот қамауда ұстау мерзімін ұзартудан бас тартқан. Себебі тергеуші тиісті өтінішті уақытында бермеген. Өтініш беруші жаңа айғақтар мен деректерсіз қайта қамауға алу оның бостандыққа және жеке басының қолсұғылмаушылығына қатысты конституциялық құқықтарын бұзады деп есептеген.

Конституциялық Сот адамды соттың қолданыстағы шешімінсіз қамауда ұстауға қатаң тыйым салынатынын еске салды. Алайда заңнамада бір-бірінен ажырата білу қажет жайттар бар.

«Заңнамада соттың қамауға алуға тікелей санкция беруден бас тартқан жағдайы мен адамның қамауда ұстау мерзімі аяқталғандықтан босатылған жағдайы ажыратылады. Егер сот санкция беруден бас тартса, бұлтартпау шарасын қайта қолдануға тек жаңа мән-жайлар болған жағдайда ғана жол беріледі. Құқықтардың шамадан тыс шектелуіне жол бермеу үшін адамның бұған дейін қамауда болған уақыты есепке алынуға тиіс», — деп түсіндірді конституциялық бақылау органы.

Сонымен қатар бұл нақты жағдайда өтініш беруші қайта ұстауға санкция берген тергеу судьясының шешімімен келіспеген.

Конституциялық Сот нақты айғақтарға құқықтық баға беру және күдіктің негізділігін тексеру прокуратура мен жалпы юрисдикциядағы соттардың тікелей міндеті екенін атап өтті. Қайта ұстау кезінде заң бұзушылықтарға жол берілсе, сот актілерін қайта қарауға да осы органдар уәкілетті.

Бүгін, 09:19