Ким Чен Ын КХДР көшбасшысы лауазымына қайта сайланды

Ким Чен Ын КХДР Мемлекеттік істер төрағасы лауазымына қайта сайланды. Бұл  республикадағы ең жоғарғы лауазым, деп хабарлайды Arasha.kz сайты КХДР Орталық телеграф агенттігіне (ЦТАК) сілтеме жасап.

22 наурызда 15-ші шақырылымдағы Жоғарғы Халық Жиналысының (ЖХЖ) алғашқы сессиясында Ким Чен Ын КХДР Мемлекеттік істер төрағасы болып қайта сайланды.

«Мемлекетіміз бен халқымыздың атынан өкілдік ететін КХДР Мемлекеттік істер төрағасын ұсыну  мемлекеттік саясаттың ең маңызды ісі. Бұл шешімді бүкіл корей халқының тағдыры мен болашағы, республиканың мәңгілік абыройы мен құдіреті үшін, сондай-ақ ел іргесі қаланғалы бері болмаған мемлекеттік өркендеу кезеңін тоқтаусыз даму дәуіріне айналдыру мақсатында жоғарғы билік органы халықтың біртұтас еркін ескере отырып қабылдады», - делінген КХДР Орталық телеграф агенттігінің хабарламасында.

Жоғарғы Халық Жиналысы өз шешімін 23 наурызда жария етті. Мемлекеттік істер төрағасы лауазымы республикадағы ең жоғарғы қызмет болып саналатыны айтылған.

Еске сала кетейік, 23 ақпанда Ким Чен Ын КХДР Еңбек партиясының хатшысы қызметіне қайта сайланған болатын.

Сонымен қатар, 5 ақпанда Ким Чен Ынның бұрын мемлекет негізін қалаушы Ким Ир Сен иеленген «президент» лауазымын мұраға алуы мүмкін екені белгілі болды. Бұл мәселе партияның тоғызыншы съезінде және одан кейінгі Жоғарғы Халық Жиналысының отырысында қаралуы мүмкін.