Көкшетау Петропавл тас жолын 2027 жылы кеңейте бастайды

Көкшетау – Петропавл автожолын келесі жылы кеңейту жоспарланып отыр, деп хабарлайды Tengri Auto 24.kz-ке сілтеме жасап.

Тасжолдың ел үшін транзиттік маңызы зор. Оның жалпы ұзындығы – 200 шақырымға жуық. Күн сайын бұл жолмен сегіз мыңнан аса автокөлік, соның ішінде жүк көліктері өтеді.

"Қазір бұл екі жолақты жол. Кеңейтуден кейін ол бірінші техникалық санатқа сәйкес келеді және бөлу жолағы бар төрт қозғалыс жолағы болады", - деп атап өтті "ҚазАвтоЖол" облыстық филиалының директоры Хамзат Сұлтанов.

Жол мамандарының сөзінше, кеңейту жұмыстары тасжолдың өткізу қабілетін арттыруға, көлік жүктемесін азайтуға және қозғалыс қауіпсіздігін нығайтуға мүмкіндік береді.

Естеріңізге сала кетейік, Мемлекет басшысы Қасым-Жомарт Тоқаев сәрсенбі күнгі Жолдауында Қазақстандағы жолдардың сапасына байланысты шенеуніктерді сынға алды. Президент республикалық та, жергілікті де маңызы бар барлық автомобиль жолдарының сапалы салынуын қамтамасыз етуді тапсырды.

Тоқаев елдегі барлық автомобиль жолдарына – республикалық та, әкімдіктердің қарамағындағы жергілікті жолдарға да – жауапкершілікті Көлік министрлігі арқылы Үкіметке беруді тапсырды.

Мемлекет басшысы жол инфрақұрылымын дамыту және Көкшетау – Петропавл автожолын кеңейту қажеттігін мәлімдеді.

Бұған дейін Қазақстанда өткен жылы азаматтардың жергілікті жолдар мен көшелердің жағдайына қатысты шағымдарының саны бір жарым есеге артып, 60 мыңға жуықтағаны туралы айтылды. Бұл туралы Үкімет отырысында премьер-министр Олжас Бектенов мәлімдеді.

Бізді Google-дың негізгі дереккөздер тізіміне қосыңыз