Атырауда спортқа бөлінген қаражаттың құжатсыз жұмсалуы анықталды

Спортшылардың іссапар шығындарына бөлінген жарты миллиард теңгеден астам қаражаттың жұмсалғанын растайтын құжаттар болмаған.

«АЖ» редакциясына Атырау облысы бойынша Ішкі мемлекеттік аудит департаментінен хабарлағандай, облыс әкімдігінің Дене шынықтыру, спорт және туризм басқармасында бюджет қаражатының жұмсалуына тексеру жүргізілген. Аудит үш жылдық кезеңді қамтып, оның барысында Бюджет кодексінің, мемлекеттік мекемелерде бухгалтерлік есеп жүргізу қағидаларының және бюджет қаражаты есебінен қызметтік іссапар шығындарын өтеу қағидаларының бұзылғаны анықталған.

Мәселен, 2022 жылы өңірдің құрама командаларының жаттықтырушылары мен спортшыларына спорттың әртүрлі түрлері бойынша республикалық және халықаралық жарыстарға қатысу үшін 145 млн теңгеден астам қаражат берілген. Алайда тексеру кезінде шенеуніктер жұмсалған шығындарды растайтын құжаттарды, яғни аванстық есептерді ұсына алмаған. 2023 жылы да 285,9 млн теңгеге, ал 2024 жылы 203,9 млн теңгеге қатысты мұндай есептер болмаған.

Департамент басшысының орынбасары Зоя Сапарованың айтуынша, аудит нәтижелеріне ешқандай қарсылық білдірілмей қол қойылған. Осыдан кейін облыстық спорт басқармасына анықталған заңбұзушылықтарды жою және оған жол берген тұлғалардың жауапкершілігін қарастыру жөнінде нұсқама берілген.

Сонымен қатар экономикалық сотта департаменттің мемлекет кірісіне 635,7 млн теңгені өндіріп алу туралы талап-арызы қаралып жатыр. Бұл — аудит барысында анықталған қаржылық заңбұзушылықтардың жалпы сомасы.

Лев ГУЗИКОВ

Фотоиллюстрация ЖИ арқылы жасалған

Бүгін, 09:33