Саясат спортқа араласқанда...

Бірін­ші­сі, жарыс­ты ұйымдастырушылар (оған ФИФА-ны да қосуға болады) өздерінің сая­си жауларын әбден қорлады. Олар Иран футболшыларын әрі-бері сандалтып, әбден әбігерге салды. АҚШ-тың талабы бойынша, парсылар сол мемлекеттің аумағына кездесу өтетін күні ғана еніп, бәсеке аяқталған бетте дереу Мексикаға қайтуға тиіс. Тіптен түнеуге де мүмкіндік бермеді. Екіншісі, 1/16 финалдағы АҚШ және Босния мен Герцеговина құрамалары арасындағы матч­та Фоларин Балоганның алаңнан қуылғаны белгілі. Келесі күні аталған мемлекет басшысы Дональд Трамп ФИФА президентіне телефон шалып, шабуылшының жазасын кешіріп, оның алаңға шығуына рұқсат беруін сұрады. Джанни Инфантино Трамп мырзаның бұл «өтінішін» жерге тас­тай алмады. Францияға қарсы матчтан кейін Парагвайдың 61 жастағы сенаторы Селеста Хосефина Амарилья өздігінен Килиан Мбаппеге килікті. Ол футбол жұлдызын «өзін француз ретінде көрсетуге тырысқан отарланған камерундыққа» теңеді. Ол аздай, «Ана сүтінің орнына кокос сорған бейбақ» деп кемсітті. Сол-ақ екен, көптеген лауазымды тұлға мен саясаткер, атақты спортшылар мен қоғам қайраткерлері санасыз сенаторды сын садағына алды. Бұл іске Францияның президенті Эмманюэль Макрон да араласты. Мемлекет басшысы «Амарильяның сөзінде рассизм бар» деп оны ашық түрде айыптады. Ал Мбаппенің өзі оны «Ар-намыстан жұрдай, саяси сауаттылығы тым төмен әйел», деп атады. Ұлыбритания парламентінің мүшесі Лейл Моран Англия құрамасының капитаны Харри Кейнге «Рыцарь» атағын беру жөнінде бастама көтерді. Мундиальда жасындай жарқылдаған 32 жастағы шабуылшы алты мәрте мергендік танытты. Әлем чемпионаттарында барлығы 14 гол соқты. Жалпы, ағылшындардың ұлттық командасы сапында Харри 85 рет нысананы дәл көздеп, аталған мемлекеттің тарихындағы ең үздік сұрмерген атанды. Кейнге дейін «Рыцарь» атағын әйгілі футболшылар – Стэнли Мэттьюз (1965 жылы), Бобби Чарльтон (1994), Пеле (1997) және даңқты бапкер Алекс Фергюсон (1999) иеленген еді. Биылғы доп додасында ФИФА-ның жаңадан қабылдаған ережесіне сай ­аузын қолымен қалқалап сөйлегені үшін екі футболшының алаңнан қуылғаны мәлім. Олар – парагвайлық Мигель Альмирон мен эквадорлық Пьеро Энкапье. Бірақ бұл ережені УЕФА құптаймай отыр. Олар өздері өткізетін жарыстарда осындай әрекеттері үшін ойыншыларды жазаламайтынын жария етті. Тұсаукесер кездесуінде Швециядан 0:5 есебімен ұтылған соң Тунис құрама­сының бас бапкері Сабри Лямушидің орнына дереу Эрве Ренар тағайындалғаны белгілі. Топтық турнир аяқталған бетте Себастьян Беккасесе (Эквадор), Марсело Бьелса (Уругвай), Хон Мён Бо (Оңтүстік Корея), Джамал Селлами (Иордания), Стив Кларк (Шотландия) және Мирослав Коубек (Чехия) бас бапкер қызметінен кетті. Осы жарыстың фавориттерінің бірі саналған Нидерланд пен Германия құрамаларының тізігінін ұстаған Рональд Куман мен Юлиан Нагельсман да плей-оффтағы сүреңсіз ойындардан кейін орындарын босатты. Көп кешікпей қызметінен айырылғандар қатарына Карлуш Кейруш (Гана), Себастьян Бекасесе (Эквадор), Хавьер Агирре (Мексика), Роберто Мартинес (Португалия) және Златко Далич (Хорватия) қосылды.