“АҚШ тан да жақсы“. Авиациялық әкімшілік басшысы Түркістан мен Шымкент әуежайларын мақтады

Қазақстанның авиациялық әкімшілігінің (ҚАӘ) жаңадан тағайындалған бас директоры Майкл Дэниел қазақстандық әуежайларды аралаудан алған әсерін бөлісті. Ол кейбір нысандарды АҚШ әуежайларымен салыстырды, деп хабарлайды Tengri Travel.

Қазақстанның авиациялық әкімшілігінің (ҚАӘ) жаңадан тағайындалған бас директоры Майкл Дэниел қазақстандық әуежайларды аралаудан алған әсерін бөлісті. Ол кейбір нысандарды АҚШ әуежайларымен салыстырды, деп хабарлайды Tengri Travel.

ҚАӘ мәліметінше, Қазақстанда 104 әуе кемесін пайдаланушы жұмыс істейді. Республиканың мемлекеттік тізілімінде 973 әуе кемесі тіркелген. Елде 25 әуежай, әуе кемелеріне техникалық қызмет көрсету және жөндеу бойынша 28 ұйым және 21 авиациялық оқу орталығы сертификатталған.

"Жеке тәжірибеммен бөлісуге рұқсат етіңіздер. Түркістан және Шымкент әуежайларында болған кезімде жолаушыларға қызмет көрсету сапасына тәнті болдым. Менің ойымша, қос әуежай да Америка Құрама Штаттарындағы ауқымы жағынан ұқсас әуежайлардың стандарттарына сай келеді немесе олардан асып түседі", - деді Майкл Дэниел үкімет отырысында.

Авиациялық әкімшіліктің бас директоры қазақстандық әуежайларда әлі де бар проблемаларды атап өтті. Соның бірі – әуе айлағының маңындағы қоқыс полигондары.

"Атырау, Семей, Өскемен, Көкшетау, Балқаш және Үржар әуежайларына жақын орналасқан қоқыс үйінділері әуе кемелерінің құстармен соқтығысу қаупін арттырып, авиакомпаниялар үшін пайдалану шектеулерін тудырады. 2025 жылы әуе кемелерінің құстармен соқтығысуының 280 жағдайы, ал биыл бірінші тоқсанда 33 жағдай тіркелді", - деді әкімшілік басшысы.

Оның айтуынша, Атырау әуежайының жанындағы қоқыс полигоны құстарды өзіне тартып, ұшу қауіпсіздігіне қатер төндіреді.

"Тағы бір мәселе – кедергілер санының артуы және әуежай маңындағы жерлердің нысаналы мақсатынан тыс пайдаланылуы. Алматы әуежайының маңындағы аумақта 160-қа жуық, ал Шымкент әуежайы ауданында 150-ден астам кедергі анықталды", - деп толықтырды Дэниел.

Оның сөзінше, осы түйткілдерді шешу үшін ҚАӘ әуежай маңындағы аумақтарды аймақтарға бөлу схемаларын әзірлеп, әкімдіктерге жолдаған. Алайда көп жағдайда бұл схемалар әлі күнге дейін елді мекендерді дамытудың бас жоспарларына енгізілмеген, бұл әуежайлар маңында жаңа нысандар мен кедергілердің одан әрі пайда болуына әкеп соғады.

"Әкімдіктермен өзара іс-қимылды күшейту қажет, бұл өз кезегінде ұшу қауіпсіздігін қамтамасыз етудің және әуежайлардың тұрақты дамуының маңызды шарты болып қала береді", - деп мәлімдеді Майкл Дэниел.

Авиациялық әкімшілік басшысының айтуынша, 2025 жылы және 2026 жылдың бірінші тоқсанында азаматтық авиация саласының субъектілеріне 1 202 тексеру жүргізілген. 7 әуекомпанияға қатысты пайдаланушы сертификаттарының қолданылуын тоқтата тұру немесе кері қайтарып алу шаралары қолданылды. Сондай-ақ 4 авиациялық оқу орталығының қызметі мен әуе кемелеріне техникалық қызмет көрсету және жөндеу ұйымдарының 2 сертификаты тоқтатылды. Бұдан бөлек, 8 аэродромға қатысты 15 шектеу енгізілді.

Еске сала кетейік, Майкл Дэниел 4 мамырда Қазақстанның авиациялық әкімшілігінің басшысы болып тағайындалған.

Google News арқылы жаңалықтарымызды қадағалаңыз