Ақша үшін көлік астына түскен автоалаяқтардың құрбаны болмау жолдары

Ақтөбеде бір ер адам актерлік шеберлігі арқылы ақша таппақ болған, бірақ ол үшін заңсыз жолды таңдаған. Ол жаяу жүргіншілер өткелінде жол-көлік оқиғасын сахналаған, деп хабарлайды Tengri Auto.

Ақтөбе облысы полиция департаментінің мәліметінше, ер адам Жиенбаев пен Ташкент көшелерінің қиылысында "жалған жол апатымен" айналысқан. Ол алдымен өзін көлік қағып кеткендей кейіп танытып, кейін жүргізушілерден ақша талап еткен.

Instagram-дағы бұл жарияланымды көру

Polisia AQTOBE (@polisia_aqtobe) жарияланымы

Оның актерлік ойынына бірнеше жүргізуші сеніп қалған: олардың бірі мобильді қосымша арқылы оған 250 мың теңге, ал екіншісі 200 мың теңге аударған. Жалпы шығын көлемі 450 мың теңгені құрады.

Үшінші мәрте бұл айласы іске аспады, себебі жүргізуші полицияға жүгінуді жөн көрген. Тексеру барысында ақпарат расталып, аталған тұлға күдікті ретінде танылды.

Іс бойынша болған оқиғаның мән-жайын анықтауға бағытталған қажетті тергеу амалдары жүргізіліп жатыр.

Бұған дейін жаяу жүргінші көліктің астына әдейі түскен жағдайда қалай әрекет ету керектігін анықтаған едік. Біріншіден, жүргізушіге оқиға орнынан кетпеу және полиция мен жедел жәрдемнің келуін күту маңызды.

Көлікті тоқтатып, полиция қызметкерлерін күтіңіз. Оқиғаға қатысушылармен сол жерде келісуге тырыспаңыз.

Түсініктемеде жүргізуші бұл әдейі ұйымдастырылған жол апаты деп күдіктенетінін және жаяу жүргіншінің көлік астына әдейі шыққанын немесе секіргенін көрсетуі қажет.

Полиция қажетті өлшеулерді жүргізгенге дейін көліктің және басқа да заттардың орнын ауыстырмаңыз. Мүмкіндігінше жол-көлік оқиғасы болған жерді фото мен видеоға түсіріп алыңыз.

Егер оқиға сәті бейнетіркегішке түсіп қалса, түпнұсқа жазбаны сақтап, оны полицияға тапсырыңыз. Видео оқиғалардың реттілігін анықтауға көмектесуі мүмкін.

Іс жүргізу аясында автотехникалық сараптама тағайындалуы мүмкін. Ол жол-көлік оқиғасының мән-жайын анықтауға және болған жайттың хронологиясын қалпына келтіруге мүмкіндік береді.

Бізді Google-дың негізгі дереккөздер тізіміне қосыңыз