Ақтау теңіз солтүстік терминалы экспорт қарқынын күшейтті

2025 жылдың он айында Ақтау теңіз солтүстік терминалының жұмыс қарқынын арттырғаны анықталды, деп хабарлайды Egemen.kz.

Маңғыстау өңірлік қоғамдық Коммуникация орталығының мәліметінше, биыл 697 мың тонна жүк өңделіп, өткен жылмен салыстырғанда 187%-ға артық нәтиже көрсетілді. Экспорт көлемі 537 мың тоннаға жетіп, 304% өсімге ие болса, импорт 160 мың тоннаға дейін ұлғайған.

Негізгі жүк түрлері бойынша да тұрақты өсім байқалады. Астық өнімдері 279%-ға артып, 408 мың тоннаға жетсе, өзге жүктер 127%-ға көбейіп, 289 мың тоннаны құрады. Контейнерлік тасымалдар көлемі де екі есе артып, 17501 ДФЭ болды.

«2018 жылы пайдалануға берілген нысан заманауи техникамен жабдықталған. Терминалдың жалпы аумағы 39 гектарды қамтиды, жылдық жобалық қуаттылығы – 3 млн тонна. Оның ішінде 2 млн тоннасы жалпы жүктерге, 1 млн тоннасы астық өнімдеріне тиесілі. Астық терминалы бір мезетте 60 мың тоннаға дейін астық сақтауға мүмкіндік береді», дейді Инжиниринг және қауіпсіздік жөніндегі директор Ермек Молдабеков.