Ақтауда бүлдіршіндерден құралған оркестр бар

Бөбекжай тәрбиеленушілері даңғыра, асатаяқ, тұяқтас секілді ұрмалы музыкалық аспаптарда еркін ойнайды. Төрт-бес жастағы өнерпаздар облыстық, республикалық байқауларда жүлде алып жүр. 

Қазақстандағы ең жас дирижер Ақтауда тұрады. Ханшайым Қадырбек небәрі бес жаста. Музыка пәнінің мұғалімі оның өнерге қабілетін байқап, дирижерлік өнерге баулыған. Балалар оркестрінің репертуарында бірнеше күй мен екі халық әні бар. Өнерлі балақайлар қазақ халқының көнеден келе жатқан ұрмалы музыкалық аспабы тұяқтаста ойнағанды ерекше ұнатады екен. 

Ханшайым Қадырбек, балалар оркестрінің дирижері:

- Мені барлық балалар тыңдайды. Өйткені мен дирижермін. Өскенде жұлдыз болғым келеді. 

Талғат Исламұлы, тілші:

- Балалар оркестрінің негізгі музыкалық аспабы - тұяқтас. Жылқының тұяғынан жасалатын бұл аспапты біріне-бірін соғып ойнау 3-4 жастағы бүлдіршін үшін аса қиындық тудырмайды. Әрі қолдың моторикасын жетілдіріп, сол арқылы бала санасының дамуына көмектеседі. 

Бөбекжайда ұрмалы аспаптар оркестрін Гүлбану Әділбайқызы құрған. Тәжірибелі педагог төрт және бес жастағы балалар тобына музыка пәнінен сабақ береді. Бүлдіршіндердің өнерге қызығушылығын арттыру мақсатында домбыра, қобыз, сазсырнай сияқты аспаптар балабақша қаражатына сатып алынған. Ал барабан жиынтығын ұстаздар темір, картон қағаз, пластиктен жасалатын тұрмыстық заттардан құрастырыпты.  

Гүлбану Әділбайқызы, музыка пәнінің мұғалімі:

- Жалпы балабақша баласы шертетін аспаптарды тарта алмайды. Олардың саусақтары әлі кішкентай. Мысалы, домбыраны тарта алмайды деген сияқты. Көбіне біз ұрмалы аспаптармен жұмыс жасаймыз. Музыка әлемі жасанды және табиғи болып бөлінеді ғой. Сондықтан балаларға жасанды ыдыстардан қолдан жасаймыз, дыбыс шығаруға аспаптарды дайындап береді. Олар өздері де бізбен қосылып жасайды. 

Назгүл Шырақбаева, балабақша директоры:

- Біз өзіміздің үлкен жұмысымызды көрсетіп бөлісуге, шеберлік сыныптарын өткізуге балаларға және өзіміздің әріптестерімізге әдістемелік көмектерді көрсетіп, өз тәжірибемізбен бөлісуге дайынбыз. 

14 бүлдіршіннен құралған оркестр республикалық, халықаралық сайыстарға қатысып, бірнеше рет топ жарған. Мәселен, биыл Алматыда өткен «Жаңа жұлдыз» байқауында Гран-при жүлдесін жеңіп алды. Өткен жылы «Дара бала» ұлттық жобасына арнайы шақыртумен барып, көрермен қошаметіне бөленіп қайтты. Талантты балақайлар жуырда өтетін есептік концертке қызу дайындық үстінде. 

Авторлары: Талғат Исламұлы, Ренат Досалиев